رائد ابو فتيان
عليك اول قصيدة محلفك تعود
المابيهه صور لنكتـبت بروح
بسذاجتهه بسبكها الباقي معيوب
بكثر ما بيهه ركة تريدك الروح
انتهه دور الجمال بهاي العيون
والف يوسف اجه وما عبره ويروح
اعله حسنك بقت عيني تصيح الله
وجفيت ولسه شوف العين مبحوح
مشه وياك الوصف هسه انه مجبور
اكتب والقصيدة تنكط جــروح
قمم هيبتنه جانت واليكرهون
جعوب جدامنه يشوفوهن سـطوح
لكن من رحت خليتني بحال
من اوكف تكول انسان مطــروح
امن اول ما رحت هديت المتون
وظلم وني اذا سميته مفضـوح
اذا يم وني جبت الفاكده وليد
تشوف ام الولد ماتعرف تـــنوح
ارتفع روج الشماتة لهامة الشوف
ابلم راضع ضيافة وبابه مفتــوح
وانت تكلي تطلع برهن شلون
ونه لدمعي النزل يراد ســابوح
ثلثين العمر ضيعته وياك
وشلي باخر ثلث من راح اضـيعك
شعجب نزلت روحي الجانت شراع
ونه المانزلت فد يوم دمــعك
ماودعتك اني بيوم المشيت
رفعت ايدي بتعب كل همي ارجــعك
اريد اومي تعال ورجفت الايد
منكد ما قوت ظنوني اودعك
