عماد الناصري
ذوله اطيور مالك فجرتهم ليش
وحمامات السلام اشبيك تذبحهن
ذيج الناس تزرع بالحديقة اورود
واحنه ابمكبرة الوردات نزرعهن
مثل شدت ورد وطشرن عل كاع
لان ميت ضميرك ردت تسحكهن
ذني ورود جنة وبارض بغداد
ما تعرف تشمهن ليش تكطعهن
مسيحيات ماتن بس عراقيات
وكف دمع الصليب بعين مريمهن
اشك الفجروهن مو عراقيين
اوهام على الحقيقة وردت ارهمهن
بس موقف هضمني وهز ضمير الكون
واحد دنت نفسه وباك معضدهن
آنه الجنت يمهن شاهد اعلى الصار
شك زيجة الرصيف وضم كصايبهن
انحنه شايب عليهن جسمه كله اجروح
طلع هذا العراقي يصير والدهن
صرخ ذني بناتي امكشفات شلون
جيب الخارطة يا حسين نسترهن
خرج من نور ذني شلون ملضومات
دمهن خيط نور والله لاضمهن
ذني اجمل كلاده بركبة التاريخ
وبصدر العراقي انواط علكهن
عليهن جامعتهن تنشد الدفان
ذني بلايه جثه شلون تدفنهن
ولا جيت الهواجس مثل بعض الناس
هواجس هيه جتني ورادت ارصدهن
صورة ابطن صورة اتعب الرسام
لكن عيب اتعب وانه شاعرهن
موش ابقطعة سوده ونكتب استنكار
لازم قطعة بيضه وكون ربطتهن
امهن تنتظرهن عينها على الباب
وبس تابوت اجاها شلون حالمهن
عزرائيل يمهن لحظة التفجير
خجل من شاف ظلهن كام يسترهن
انت وابن لادن ما اكول اجلاب
ما ترضه الجلاب العار يلحكهن
