ايمان الكوفي
ياخرافه..وياطعم بوسة حرام
ابحلم راهب,,
وانا تسع اسنين عمري
ومارست فرض الصبر
رحت ادور بلكي ينصفني امام
الكيتك ويه الحور سارح
ولمحت ولدان كالولي خدم
بينك ومابين كل
,,,تعليل يتبنه وجودي
جيوش من المعجزات.
تنفر الدمعات واتكفر ضحكتي
وتحكم اشفافي ابذنوب الموبقات
روحي بدعه
ونظرتك نهج البلاغه
ودنيتي دونها مستشرق اجير
حاول ايصوغلها مغزه
وسبب مسنود الهبل
انته حتى اوهامك الواقع يصدكه ويطبقه السلف
واني ادور عل الحقيقه ابين كثبان الخيال
الامل,,, لعبه وعدل وزن القصيده
..والفرح,,, حكم القوافي
والحبيب حيله شرعيه
ابتدعها احساسي يتمنه ويغازل بالهوه
وللسراب يأشر يصيحه تعال
احلامي خطوه وضاعت ابهبة رمال
ابربع صحراء الجزيره
وانته بعيونك
حضاره
بكل عصر تطبع اثر
يحتكر ليلك مواقيت السعاده
وساعتي وقته حزني عله القدر
مختلف جدا اكيد
وماعشت نار البعيد
كلها تحت امرك يجيك شما تريد
وانه حته النقطه محسوبه عليه
ودنيتي بجرة قلم
يسلبها شيخ
لو يفرهدها حرامي بعقد مجهول الاجل
