نشأت الخالدي
تريد أنساك جا عاوني أنساك
بشرط كون أنته تضمن أنسه طاريك
كلت ماأحجي بيك كبال هالناس
كمت جي جذبوني وحلفت بيك
ورجل عيني تعبت عله دربك هواي
من كد ماتروح وترجع عليك
أراويك الفرح رغم أنه بالضيم
وأنته الفرحه وتكلي شأراويك
الهوى لو مر عليه اتعارك وياه
وأنته بصفي خاطر لا يمر بيك
أخاف عليك حتى من الهوى الهاب
وأخافن حتى من أيدك اعله أديك
وأغار عليك من الغيره التغار
وتغار الغيره من الغارت عليك
أبودي الماي اعدمه اليلمس شفاك
وبدي لساني أكصه جي يحاجيك
زعلني وأكلك أني غلطان
وحب زعلك لأن جي بيه أراضيك
ولان انت قوي وتفرح من تفوز
لذلك انه احبنه رهانك
لساني أكصه أذا غلط فد يوم
واذا تغلط أكلك صح لسانك
بست فد مره كرسي وضحكت الناس
وتخبلوا من دروا هذا مكانك
شلون أنساك وانته انه يمحبوب
واذا انساك معناها أنسه انه
كلت ماروح يمك خاطر أنساك
شو وكفت يمك تعنه وهو أجانه
شفت انه مكانك درتها العين
حجه وكلي تعال انه مكانك
أعبرت كلته أغمك بلكت تلوح
أشو غمتنه صارت أمدانه
