سعد محمد الحسن
فطنه عالهظم والعوز والحسرات
وفكهنه عالبجي وعالدم فتحنه العين
شمسوين ؟؟
انتبهنه على الكنى والسوق والتجنيد
وعلى الالي ومشاة ونقل والتموين
شمسوين ؟؟
لكينه امنه جرح ويسمطه ملح العوز
جف بيه مستحه وجف يدور طحين
شمسوين؟؟
لكينه امنه غموس بسفرة اللوعات
ومثل علج المطر ويلوج بيها البين
حس مبحوح امنه والضماير موت
وين الكه اخو خيته وين راح الزين
وينه الزين وينه اليدك صدره ويوفي عنه الدين
وينه الزين لكينه حرمله والشمر والحجاج
ودورنه شكثر بس مالكينه حســــين
شمسوين؟؟
لكينه اثار وحشي وغدر ابوسفيان
ولاصادفنه الحمزه اليكص عيب البين
لكينه العامري يتجعبن عالكوم
يجول على الربع ومدنجه الصوبين
ونعرفه بس علي اللي فكس عين الليل
تعبنه من الدوارة وماكو ابو الحسنين ..
شمسوين شمسوين ؟؟
لكيناها شظايا ويانه بالكاروك
ولكينه التلولي تمرعد السجين
انجبسنه من القصف واشعوط البارود
اشجنينه من الوكت ولياهو مطلوبين
مميتنه مصيبه والحليب هموم وخرخاشتنه حسره
وحيرة متيهين
شمسوين شمسوين ؟؟
اسلاك الشائكه دكوها حبل هموم
نشر عليه عمر مابيها حلوه سنين
شمسوين شمسوين؟؟
مافطمونه اهلنه جذب هذا الكال
من الله خلقنه واحنه مفطومين
حدايقنه مواضع جنها ساحة موت
مزكيه منايا ودمع مظلومين
وره كل جذع خاوي لبد شبح الموت
وشواجيري يتدلن فوك جذع التين
رمان شكثر تارس شليل الكاع
دفاعي لو هجومي شرط عالسجين
شمسوين شمسوين ؟؟
وقناعات احنه عدنه مو قناعة روح
قناعة وقاية الترست الصوبين
جم جدول عذوبة يفيض عند الناس
وجدولنه ضبط بيه الحبس تدوين
شمسوين شمسوين؟؟
مرجوحتنه دمعه يهزها جف الاخ
تطيح من التعب وين اليكومك وين
اطفال الناس تلعب بضوه السعادات
ولعبتنه احنه انفلاقي يغوش الميتين
شمسوين شمسوين ؟؟
كلايدنه قرص بس موهوية البيه
ولادم وفصيله بينه دم منين
وي كل حس قذيفه البيت يهتز طين
يفززنه القصف واحنه بمعزت النوم
مثل لجمة جرح من نفس مرعوبين
ويظل ينكت مرووه السكف مال الطين
