سمير صبيح
تريدني اكتبلك شعر عن البنات
يا ترافة تريدها بشعري تبات
شعري فك عينه لگه گباله نطاق
وبندقية وسفري وحب العراق
حبله وحده وبمواعيد التحاق
وچان موعدهم يتم بالعرضات
ياترافه تريدها بشعري تبات
هناك عندي عيون ظلت ما تنام
حتى يبقى براحته يطير الحمام
هناك علساتر عشت قصة غرام
چنت عاشگ راجمة من الراجمات
ياترافه تريدها بشعري تبات
انه ما احلم احب واهوى بجنون
قمة احلامي افصل بنطرون
انه لو مرتاح اكتب علعيون
والشفايف والجفون الناعسات
ياترافه تريدها بشعري تبات
ويا علاقة اليوم ما بيها دغش
والعلاقة الطيبة تنشال بنعش
شتعتقد سوزان ترتاح الشلش
لو دهش كشاخ وتحبة نجاة
يا ترافه تريدها بشعري تبات
وخل يسولفلك دمع عيني اليسيل
عن بثينة وكتي يحجيلك قليل
عدها 6 اطفال صارو من جميل
كلهم يجدون بالشارع حفات
وتريدني اكتبلك شعر عن البنات
وعدنه ليلى تبيع بالوگفه دهن
وقيس حمال ويكد بس عالبطن
نسأل الجوليت گالت بالسجن
روميو التعبان بايگ تايرات
عمي ياحب دعوفني يا ذكريات
