رفعت الصافي
خطبوني غصب ولغيرك انزفيت
وحفرو كبري لمن عقدوا القران
جبروني وصرخت احضرني يل العباس
انه وحيدة وعكلهم ترست الديوان
طش مستقبلي من طشو الجكليت
وركبة ونص كعد كل جرح نايم جان
… حته الما يشور بي علك شديت
طب ليحضره تلكه اسمك عله البيبان
كرف شعري التراب وياه من امشيت
مديون وتمشه بيدرة الديان
جني تيسرت ما جن انه نزفيت
اليشمني يكول فكدت بالحرب خوان
غص بالحلقة اصبعي وما برد ملكاي
انه حرورة رصاصة بتفكة المعدان
ومنحل شعري علمتني اكطع رزق عاشور
سواد البشعر ما لمحته النسوان
منسير عالنخل حسبالهم جمار
ويبلع ريجه كل عصفور بالبستان
هل شدو عبرتي بجربة المهضوم
وبصدره عطش فلاح للكيعان
وجهك ديرتي ومن شوفوني اكفاك
قصر صليت لمن كبر الأذان
اربه بكوخ الكصب لازم قبلته الهور
ويعيد لون يشتم ريحت الرعيان
ومو شرط العطش يرتوي بحسوة ماي
من الماي تيبس رية الغركان
عليلة وجنحي مو كد خزرة الصياد
وشرجية هلي حطتني بالنيشان
بشيبت جنحك استعجل يملج الموت
حمامة زينة ويزفونهه لسجان
يا رخص الجنازة لتنترك بالبيت
تنمل من تظل مرافكة الريكان
يا درب النجف سرفن تراب الكاع
عروس الجايتك يم علي تريد مجان
لتغسلوني خاف اثار ولفي اطيح
تره البرزخ يقدر شبكة الولهان
محسبة حسابي لا خلف الله ع الجناز
ابدلتي مجفنة ما تعب الدفان
باعوني برخص وذكرني يل المحبوب
اذا باعو اكبالك كحل للعميان
يولفي الكبر بارد دفو احضانك
وين تره يبجي الالحد من ينشغ البردان
ما انساك لا وبردت السرداب
لو حطوا اعظامي بسفرة الغربان
ومن تزورني امن ما اتيه لا
عطر شبكاتنه يدليك بالعنوان
