شاكر حسن
موشرط اليصلي أستاذ بالدين
ولاكلمن غلط يتسمه كافر
مظاهر ناس تلكه تشوفها العين
واكثر من وجه بيها المظاهر
حقيقة تريد اخذ من ابو الحسنين
شما تنخاه بشده ايكون حاضر
تصح نخله بتمرها تغذي صوبين
وتصح كلمة عطف تجبر خواطر
أكو عايش عبث بأجساد ميتين
واكو مطرود حته من المكابر
واكو متربع بنص الدواوين
وحرام انجان يفهم بالعشاير
وإذا الدلات تزعل عالفناجين
خراب ايظل مضيف الجان عامر
الوسخ كلبه لون يغسل بنهرين
لو يسبح عمر ميصير طاهر
والبكلبه علي والحسن وحسين
ثلج نيرانه يوم الحشر باجر
منو كال الكمر مكطوع جفين
صعدن للسما اجفوفه مناير
وشاعر ماكتب بس للسلاطين
وجوابه ايكلك الشيطان شاطر
تكدر تطغي صح وتقود جيشين
وتجند بالأمر شرطه وعساكر
تموت تكدر اسطور وعناوين
لاكن ماتموت احساس شاعر
