سامي عبد المنعم

 إشذكرك بيّه وإجيت ..؟

آنه بابك حيل سديته ..

وگلت أنساك گوّه

ونتچيت …

إشذكرك بيّه وإجيت

خلّني أترجاك ..

خلّني إبروح ميتينك

ولك توني نسيت

إشذكرك بيّه وإجيت

هواي گبلك ..

دگوا شبابيچ عمري

وعاندتهم

مادريتك تاخذ سنيني غفل

وتصير صفنة عمر بيّه

مادريت …

إشذكرك هسه وإجيت

بيّه سولة ..

اليلچم جروحي

أطش عمري إبشليله

وما أريد ..

اليضحك إبوجهي چذب

وبيه سولة ..

لو مشيت إبسچّة ماخون الدرب

سنين .. سهسهني الزمان

سنين بالغربة

وبعد بيّة لعب

لويبس هرش الصبر..

أبدي من الاول

وأفرش دروب المحبة

فياي وورود وعشب

مرّة .. شفت إثنين عصفورين

ذايبين إبعشگ كلّش حار

وآنه أرجف برد

إتذكرت ..

أول محبتي وياك

والغميضة..وبيوت العگد

چان حبنه .. زغير كلش

وچان گلبك مو جلد

راحت الدنية بأهلها

وما أظن أيامنا الحلوة ترد

عوفني ..أترجاك يمعود

ولك توني نسيت

إشذكرك بيّة وإجيت