علي عدنان الساعدي

 ليش النوم ذكره ايصير من اتغيب
سالفتك زعل فهمني سالفته
اشكايل لنعاس وكطع بيه اليال
شحاجيله علي من غبت ما شفته
ترحمني بعذابك مو تناقض هذا
حلاة الحب عذابه الكال ما لمته
ادور عاليشبهك من يصير افراك
وبعد خلكي عالطوله الغيمه صاحبته
بقه اخر ظلع بس شبكتك تسواه
شقنعه بيا زند ما يرظه الا انته
يعكس عالشعر لمن تمر عالبال
بياضك وانته تدري الشيب مو وكته
اشوكت ما تلكه راسي بلا وقار اغتاض
وعتب كلي ناسي وشخصي ما ردته
الميغرزن بثوبي عيب اكول ادموع
احس باجي صدك لو هدمي بللته
اعتمادي عالصبر من غلطة النسيان
ملامح وجهي تحجي بقمة السكته
مو مالت امكابر عندي خل مبيوك
مو مو احد خذاه دنيانه ما خذته
رديت بجدم متبريه منه الكاع
وجنح روحي انكسر والسمه مزاعلته
يالعايفني حاير ردلي وجهك راي
طفه بيه المكابر صوجي عاشرته
اشتهيت اسوالفك مشته المتنسيات
وعلى اصورك معاين عمري خلصته
ياهو العطلك توه الشباب اهنا
لو من وكت جاي وياك جا عشته
تعال عيوني ترهم باليالي انجوم
البياظ البيهن امنبجاي طوخته
عثرت مهرتي وسافر بثوبي الطين
وانه فارس احلامك زحمه لو عفته
لتتهمني بشخص كطرة حيه ما بي
اعرفك تعرفله اشلون صدكته
انه منستحي اتشيم على النهران
ما ماشي المكيف جدول بكصته
اشبهج بالحرك يا شجرة الزيتون
روحي احتركت ودخاني ما شفته