للراحل فاضل عبد السادة

 انتباه انتباه انتباه السالفه اشويه طويلة
 .. السالفه قصت حياتي وماظن تنتهي بليله
 بيها ايامي التعيسه وبيها ايامي الجميله
وقصتي بيها احداث حلوة مثل ليله والف ليله
وقصتي تصلح فلم هندي وابد ما تحتاج حيله
 ومخرج القصه زماني الماشفت مخرج مثيله
خوش مثل فلم بيه وكفه واكفلي اعله حيله
محزم وعصاته بيده يطكني كل ما اشتكيله
 خربص اسنيني عليه وتيهت راس الشليله
وصرت ناسي منين انه والمن ارجع يا قبيله
 شكد مواليدي يعالم ياهو رباني بشليله
وياهو هز كاروكي بيده ولوله بذني وسهر ليله
وياهو وصلني بحياتي شلون ارد فضله وجميله
من وعيت وانه ضايع ماكو عنوان اعتنيله
ولاكو واحد دكلي صدرة وكلي ذب حملك واشيله
 بيه حزن الناس كلها وعيني بالدمعه بخيله
 احترك وانطفي بكته مثل ريكات الرميله
وانه يالطيبين ونتي ونت المصيوب جيله
 وهمي ما سولفته لحد خاف يحسبني اشتكيله
 كورت همي اعله كلبي وجيمت روحي العليله
 عفيه روحي عفيه كلبي همومنه سهله وقليله
 ومن تضكني الدنيا اغني هاي عاداتج يهيله
انتي ويامن وفيته وياهمو ما هديتي حيله
 حيل بعد وياي جوري وعيلي بالمايرضه عيله
 انتباه السالفه شويه طويله
 راح يوم.. واجه يوم.. وانه ذاك وذاك ليلي
 للصبح ما يغفه جفني وللصبح كعده اعله حيلي
 للورق اشتكي اهمومي وخافي حسراتي بدليلي
 ردت واحد يجلي ضيمي اشتكيله ويشتكيلي
 لمت كلبي كتله عاشر خل تشم الناس هيلي
 كضت ثلث سنين عمري وانه ما اعرف خليلي
 ريتني ما عاشريته ولاكضيت وياه ليلي
 انتباه السالفه شويه طويله
 شرد اكلك عالهويته وبيش اوصفه بيا وصف
 20ما زاد عمرة زغير وراوي وترف
 حلو ويخجل من خياله وبي يعالم ينحلف
 شفته واتمناه كلبي وقبله ما حن الولف
 ومن بعد سكته طويله الشوك خلاني اعترف
 كتله احبك صد عليه وكالي انته شكد صلف
 شلون تنطق هالحجايه وما الك بيه عرف
 كتله هذا الي احسه وجرحك بكلبي كلف
 من اشوفك انسه روحي وكلبي يمعود يرف
 وشكثر حاولت اكلك لجن خانتني الجساره
 ويامه من عمري ليالي لخاطرك راحت خساره
 سكته احبك وأأخ لو تدري شكثر يم بابكم لازم خفاره
 وانته خالي ومو بحالي الشوك ما جربت ناره
هسه اجيتك اشكي ضيمي شفت ما منها جاره
 لو تردني بجرح ثاني لا داويني بعباره
كالي شتريد اكلك كتله كول الي تكوله
 كول احبك كول اكرهك يلي صرت لروحي سوله
 كال لا والله احبك كالها بضحكه خجوله
ما جنت متصور انه هيه تقنع بهسهوله
 وضلت محبته وياي مثل المستحيله
 انتباه السالفه شويه طويله
 وصار اجمل امنياتي وصرت اجمل امنياته
 وتالي ما تالي شلكيته سالفه بحلك الشماته
 ثاري مو بس انه حبني ثاري هم غيري بحياته
 وثاري كل ساعه حبيب وماخذ الناس بحلاته
 اكرهته وكرهت المحبه وكرهت كل ذكرياته
 ورجعت من درب شوكه روحي خجلانه وذليله
 انتباه السالفه شويه طويله
وراح اسولفها بصراحه لا الف ولا ادور
 عاندت وكتي بوكاحه وكتله كل ما بيك جور
 الجان ضلت تشوف عيني والعمر حزن وسرور
 وكل بشر تاليته يصفه واحد من اهل الكبور
 وما اطولها عليكم واكتفي بذني السطور
 الحزن من كد ما عشكته صار وي دمي يدور
 انه اسحنه بصبر روحي وهوه يحركني بخور
يصوغ حسراتي قصايد خاصه تهز الشعور
 نشدو ليلي شكد سهرته مثل المتاني السحور
 الناس كلمن اله طوره وانه الي 70 طور
 مره اكتب مره اصفن مره دمع العين اسيله
 والسوالف كلها تكضي وتبقه سالفتي طويله