ادهم عادل
مري بيه عيون خرسه
مري بيه دموع وكحه
مري بيه ظنون تشنقني الصبح بين الدروب
مري بيه حروف عميه لشاعر اعل الماكوعمره
لشاعر برقة حديثه بلا سبب يطفه ويذوب
مري استري دموع عيني دموعي تمشي اعل الخدود بلايه ثوب
مري بيه نجوم تبجي وديره مستاحس ضواها
ونهر طعناته بجروفه ويبدي ونه من الغروب وللغروب
مري بيه سنين صغري الضاعت بديرة عيونج
والبقه من سنين عمري تراب منثور اعلى جفج وانتي طشيني حدر جدمج سنين
مري بيه وخل ارسمج بالخيال بفكر شاعرصوره من طعم العسل واشربهه يوميه الصبح ويه الونين
مري بيه سنين عمري بلايه طولج مو سنين
مري بيه سنين عمري بلايه عينج مو سنين
مري بيه سنين عمري بلايه دمعج مو سنين
مري بيه العين مشتاكه لدلالج والدمع مل الركود يريد يطفح موج شوك وياخذ العمر بسفينه
اي وين رحتي
دخذي دينج عاد مني اخذي روحي ليش روحي بلا سبب يمي رهينه
مري بيه طيور بيضه ونورس يطوف اغلى ديرتنا الحزينه
مري بيه انسان فاشل كلشي ضيع من ادينه
مري بيه واخذي روحي ببين دمعج
نهر مديني اعلى خدج
عاف روحه وتيه جروفه وطريقه
واخذي قصة واحد مضيعه زمانه وكضه عمره يحب خيالج وانتي محبوبة صديقه
مري بيه انسان فاشل كضه عمره يحب خيالج وانتي محبوبة صديقه
اخذي قصة شاعر مضيعه زمانه ورسم حبج عل الخيال
وضاع ما بين الوهم بين الحقيقه
مري بيه
مري بس جلمة خطيه
مري جلمة هذا متعذب خطيه
ومري نجمه وكحلي عيون المسيه
يله ذليني بنظرتج صغريني بعين روحي
حتى اذل روحي بشرف بجفوف اديه
مري بيه الدنيا لبست ثوب ليل ونزعت ثياب النهار
مري لحظة عشك مشموره اعلى بابي حتى اعوف شويه بدر واحفظ شويه لنزار
مري بيه الشجر يبجي بلايه صوتج
مري بيه الصيح يبجي بلايه شوفج
مري بيه العصر خانكته بجفوفج
مري بيه الليل صافن خال خده اعلى الغروب
وينتظر حلة زلوفج
ومري انتي وصاحبي بنفس الطريق وخلي افرش روحي شارع
يله مروا بلا رحم دوسوا عليه
وضحكي حيل رويحتي من الضحكه ذابت واني ميت جوه جدمج وانتي ما تدرين بيه
وانته يا تؤم حياتي يله غازلهه بجساره
ويله انتي شويه من خجل العذاره
ودنكي راسج عل التراب
شوفي واحد جوه روحج فاك من ضلوعه باب
وكلب متشظي اعلى دربج كظه عمره من الصغر عاشك سراب
مري بيه العمر خلص مري بس لحظه اعلى بختج
مري اول عشك جذاب اعلى روحي
ومري اول ضحكه جذابه اعلى شفتي
ومري اول نفس جذاب اعلى صدري
وفرحي عمري اليتمته سنين صدج
فرحي روحي باخر سنين العمر خليني امشي اعل الكبر فرحان بعدج
