رائد الفريجي
روح مسامحك يالمو عذر مكفاك
الك ظلت سوالف مو جرح نيشان
نام براحتك واحصالي دمعه ليل.
بجفن بادي العشك والحلم بيه خلصان
البحضن الجرف يتعافه عالنسمات؟
والبحضن النهر يتنخه بالدخان.
عمر ليلي كضيته وماكبر ملكاك
بعد شسهر لهجرك والله بيه حيران
اعله كد سوالفك بعيوني ما ضل ليل
يانجمه ابحضنهه لهسه ماحلمان
ملاك وذنبك ايداين جهنم نار..
شجاك وعالطعن دليتهه الجنحان؟
السمه تنكت دمع وعيوني تنكت ناس
لكيت الشوف بيدي ومالكيت انسان.
انا مضيعك حضن مو مال ادور اعذار
لصلاه الليل كفره اتقنع بشيطان؟
ابصفار اسنينك محمل ربيعي امتاع
وعلى اذنك بالسوالف خلصيت اللسان.
الحجي يم الشماته ايصير زايد خير
سمح يم المفارك يطلع الدفان
على وجهه السمه بدت اعيوني الليل
طلع حته الضوه بعيوني الك سهران
يمن تنسام حيره واشتريك براي ؟؟
طفل طبعك واجيك انا بخلك دكان
بقت دكات كلبي براسي تطلك شيب
واليفاركني لحضه ايكلي شو كبران؟
حجي البلروح يحرك ما اتضمه اوجوه.
باقل صفنه الاسرار اتصير وكت اذان.
المحيرني نارك ما اتدفي الطيف
واليلمح ضواك ايعير البركان.
وجهك مو سمه اشعنده ويا رفكت غيم ؟
وانا من الصيف شارد حضني بيه بردان
بير اليعطش ايبلل لهاته اسرار؟
وغروب الجزيره يشتهي البيبان
شمدريني بهواك بدربه ريه ناي
وايسولف انفاسي اكبال ياهو الجان
عالفطره واثق حته بضحك عاشور
شلون اتريد اجذب بالملاكه احضان؟؟
بدفو ملكاك احس يعرك بكصتي الغيم.
وانضح بالعشك واترس الليل الوان؟
والي الكدامي وانسه بضهري اثر بصمات
للحضنه وطعنتي اثنينهن ذرعان؟
ولان وسط البحر وبجفن ماتنشاف
ماتكسر الخاطر دمعه الغركان ؟؟
