ناظم الحاشي
شدي اعصابتچ يايمه ﻻتشكين
باچر ثار ولدچ زلم تمشيله
ثعابين السياسه اعليهم اشوداچ
اوشلچ بالعبر الكتال غربيله
جريمه الفاجده امن اسبايكر شبان
الشارك بالجريمه تروح تشكيله
مالوم العقل من يطلع امن الراس
ماظل عقل صاحي براسها تشيله
من حرگة گلبها تصيح هذا وذاك
وياهو البالزلم مسلح اتوصيله
ظنت من تذب شيلتها كلها تگوم
زلم وتخورست بسلاحها الچيله
منو المنهم رجف والغيره صعدت بيه
وگام وصاح عد عيناچ يكحيله
وياهو الضرب چفه وركض يطلب ثار
اولكدهه امحدده اوگطع زناجيله
ﻻ يم الشهيد شلون هيچ ايصير
تدخلين اعله واحد ماحمه ادخيله
موش اگبال هذا الشيله تنذب كون
كون اگبال حيدر ذابه الشيله
واسمع يالسياسي الدم يريد الثار
نصيحه الخبط مايك لاتصفيله
كلها ابذمتك من تسكت اعله الصار
وشعبك بالحقايق كون تحچيله
تشتر بالدمع عين امهاتك ليش
وخوتك للمذابح تنوخذ غيله
منو ايگول السياسه اتسايس الكتال
وبروس اليتامه ذنوب تمحيله
چم مرقد نبي اتهدم وساوه الگاع
اوچم معصوم هانو شرف تقبيله
وعيسى ابلا صليب اوﻻجرس مسموع
اوعلى اطلال الكنائس حرگو انجيله
وانباعن سبايه امخدرات بيوت
ونفطك باعو الجارك براميله
وچم نازح ابنازح ماعرف لليوم
شنو ذنبه اوقضيته اوسبب ترحيله
الفتح باب الدمع ميريدك اتعزيه
اخذ ثار الدمع لتروح تبچيله
تره ايدور الوكت وايلعنك التاريخ
والشايل عنب مفضوح زنبيله
وابد لتگول ابد كل الاجونه اجناب
بساميهم الرايد تره انسميله
دفك انگابهم لوما طلع قابيل
ﻻزم خنجره اويذبح ابهابيله
واحچي اويه العشاير من اهل تكريت
ليش ابنك على ابنك تركض اتحيله
دخيلك من اجاك شلون تغدر بيه
بعد ما للأمان تروح تنطيله
وابنك من دخل بالواحد وتسعين
وضاگت بيه الوسعه اومحد ايعيله
شاركته الرغيف وبيدي اشربه الماي
اونفس ابني الذبحته الچان يحميله
مكسور العظم بسبايكر وياك
وخط رجعه اعله خوتك مانخليله
اومتوهم تره اوچذب عليك الگال
عدنه الينذبح محد ايداعيله
مافضها وعلي والجايات هواي
والواحد بلف ماشوف يكفيله
