ادهم عادل 

منين ما تلتفت عيني اتشوف اطفال وضحايا..

تلكه ناس مفرعه بكل الزوايا…

جف طفل يومي لاثر باقي من ابوه

وجف طفل يومي لاثر خطفة عبايه..

شما اكول الضحكه كبرت..

تكبر وياها الشظايا..

ناس تركض على العيشه..

وناس تركض عل ال (لحايا)..

وهذا مرجع…ذاك آيه..

وهذا كافر لان ما عنده ولايه..

داسوا كبالي حلم اصغر فقير

وداسوا كبالي حلم اكبر شريفه

وباكو الهور وكحل طينه

وكذلته وفرعوا كبالي الصريفه….

واحنه يوميه نتعارك عل السقيفه..

عالم يسألون ..

يمته اعلى الكمر نبني محطه؟؟

.واحنه نسأل..

(ليش صار اول خليفه)؟؟

شعب مدري بيش حاير؟

ما يفكر لحظه وحده

وكظه كل عمره خساير.

ناس ختلت بالتقيه

وناس ختلت بالسواتر.

وناس لبست خرزه سوده

ونزعت ثياب الضماير.

وناس اصلا ما تهم لكلشي صاير.

السني عنده الشيعي كافر.

والشيعي عنده السني كافر.

والعمايم وحده تنهد اعلى وحده

وصايره فصول وعشاير!

شعب مدري بيش حاير؟

وشعب مدري لوين راجع؟

الناس ملت من وضعهه

وعينها اعلى (الله) تباوع..

وشيله لمت كل ولدها

ونامت بكيض التقاطع..

والاطفال الحافيه الذبت جنطها

وطلعت اجدي اعلى خبزه

ترست وجوه الشوارع..

وحايره تحج الحكومه

وباقيه تخمس المراجع..

هدموا احلام الطفوله

وترسوا الديره جوامع..

وآنه مليت ارد اعاتب..

كافي يوميه نتعارك عل المذاهب ..

كافي كلمن لام ربعه

وطالع الغبشه يحارب..

ابنو فكره

رسمو صوره

خرجو طالب..

ربو للطفله كصايب..

حطو ضحكه بوجه كل انسان شايب..

فرحو جيل بعمره ما يعرف سعاده

ولا تزيدون الوكت ضيم ومصايب..

الدين ما يحتاج فتوه

وجنة (الله)انخلقت لكل طينه طيبه

الجنه مو بس للكرايب..

(والله )واضح

ما تهمه الناس تسجد..

بس يهمه الناس لو عاشت حبايب