عمار موسى
افراشك فرشته وليش تغفه ابگاع
ترف طبعك هضيمة يونس التربان
بالمغيسل لگيتك ما مصدگه تموت
واتلمس كفاك بخبصة العميان
حرت ما بين احضنك بين ابدّي الشوف
وچا عافك بدي لو يستحي الدفان
لبست اسود عليك وما يكفي اللون
تيهت الهوه ورحت احضن الدخان
خنگه البيت يبني ويل چنت نسمات
وتلبس صورتك من تكشخ الحيطان
يا شمعة البيت وظلمة من تغيب
يبني ابلا زرع ما ينفع البستان
احنّي چفوف گبرك يا عمر عريس
يل طولك حضن لبنية الجيران
ابوك وهيبته ايعلكهه بس اتطيح
لو صادف يمر اعلة الدرب شبان
ويلتم بزوية ويصفن ومهضوم
عگب ماچان طوله بحسرة البيبان
واجو ربعك بطين تغار منه الگاع
وبعد بيهم دمع بعيونهم نيشان
وملوحة بچيهم بالجنازه اتطيح
غزّر ملحي بيهم خوش الك صحبان
وبعدهي اجفوفهم ترجيّه بأذن الباب
كفو منك تعاشر موش ياهو الجان
شحچيلك بعد مو ضاگ خلگ الليل
طفه وجه الگمر بين علي حزنان
برد المگبره جاي بگفاي ايعييل
يل تدفه بعباتي لو چنت بردان
يندهني الحچي بحرورة الچلمات
وانه بطرگ البچي ومنين اجيب السان
ما اشعل شمع والليل اخلصه بشيب
عگب ما جان راسي اتضيع بيه غربان
