كاظم جابر السماوي
سرح بيه الخيال بسچته ولاگيت
مذبوحه القصيده وجثه مرميه
راوتني بنحرهه اشبيهه من اسهام
وكل سهم اللگيته بطول راعيه
ضحكتلي وبچتلي ونزل دمعي نجوم
رد ليهه ويكحل اعيونهه بضيه
ضمتني الصدرهه تگلي وج الليل
وشيل تراب وجهي وحطتني گمريه
صوغ ابحچيك امحابس شذرهن نار
واسوارات واحجول اعله رجليه
ذهب من اربعه وعشرين مو عشرين
خل اكشخ على اليتكشخن اعليه
اظفرلي الگصايب برم طوگ الراس
وخصرني او يخصرك لو رحت بيه
وراويهم اجيت بياوجه للناس
من طحت وشلتني وچنت منسيه
راويهم السانك ياعثك بي راج
اذا زهدي التهزهه اتطيح برحيه
كل تمره بقصيده وكل طعم گنطار
واثخنهن تبرزل وشل ديريه
اعصرهن دبس ضمهه الشتاك الجاي
جمد شط الشعر والروح حمريه
امشي بخطوتك شگ المسافه اثنين
توصل للبعيد وتبعد اشويه
حط چفك بچف اليرگص بنص نار
وشاف الصوت جامد واشتعل بيه
الوصل عين الشمس بزها ونزل للگاع
جاب انجومه بيده بساعه ظهريه
شفتوني من اگوم اتوچه عالمكسور
والمايعرف اشعاره وقوافيه
شفتوني من اطيح الگاع اذبهه اوياي
والخيل اعله ظهري اتزاغل اعليه
اگومن والرمح مگبل يطب بحشاي
وامشي بلا گلب والجثه مرميه
عفت الدم يدخن والجروح تشوف
والدنيا بثگلهه اعليه مرچيه
لظمتني بغزلهه ابمخيط الفنان
وبريسم صرت بثياب ورديه
كفيت الذيال اتلث اصابع فوگ
وطولت الردن واتعثرت بيه
خوصرت القصيده وزيرتها ازيار
واجت گدي اعله طولي وگصرت اشويه
حاچتلي الخيال اشماغ اليه وثوب
وخلتلي الصور بچتافي مزويه
راوتني العطش چف او وگع للماي
لو حلگ الفرات ايريدله اميه
لو جمره بجفن عاشگ كفر بالشوگ لوزفة عروس بلايه ترچيه
لو ضحچه بعراضه وميت المهوال
وتشربه التفگ والرايه شرجيه
انا اللميت روحي وصرت طيف الوان.
وبلوحة خيالي اصبحت خلفيه
گلبت الفوگ جوه وجوه صار الفوگ
وشيطان الشعر سريالي تاليه
سلفادور من شاف الحرب ضرعين
شايلهه السمه بالوان رمزيه
ولون امدخن وريشة رسم برماد
واعظب شايل الدنيه بچلاويه
وسفينه بلابحر ويجرهه خيط ابليس
وهياكل خاويه اتشد بصواريه
صاحوا مو بشر مجنون لو قديس
وابداع الشعر مجنون راعيه
اذا تسكت صفنتك ترسم اعله الناس
وملحة صفنتك طبع السماويه
بس اخيال تمشي وبيك اشوف الوان
يمرگص القوافي بليلي چوبيه
يلتارس هدمهه بعنبر المشخاب
وبنبگ الفرات تخضهه يوميه
بس طاف الزغار وترس وجه الماي
وغط ابكشخته الشبوط جاريه
غط كلمن ثجيل وطفح كل زغير
وكلمن شاف گدره وعرف تاليه
حگهه السمچه تعطش وبحلاة الماي من تشوف كلمن ذبله سليه
اذا الخطاف لولح روحه بالمگلوب
حگه ايگول شو ما هيه رجليه
بس مامش اعيون اتلم صور وتشوف
الا بگد نظرهه ويمكن اشويه
