كاظم التميمي

أسطر حروف تتمايل

على القرطاس تتلملم

تركَص لو نشدت الها

بسم اهواي تترنم

تضرب وتر بعد اوتار

منها النغم يتكلم

لو بسم حبيبي او كَال

حبني حيل… واتمهل

أسطر احروف مليانه

ضحكات وامل واحلام

تبنيها السطور اقصور 

بأزهار او ورد بسام

من روض الربيع يفوح

عطر الورد بالانسام

لو بسم حبيبي او كَال

حبني حيل… واتمهل

أسطر احروف تتغنه 

مثل البلبل بشجره

يصدح بالفرح انغام

إلها الروح مستره

ابلمسه من الهوى اللافح

تطفي كَلوب محتره

لو بسم حبيبي وكَال

حبني حيل… واتمهل

أسطر حروف تتمشه 

على الرملات تتربع

اتناجي الماي فرحانه 

او ريكَان الجرف تسمع

هدير الروج عالي يون

عينه من الفرح تدمع

لو بسم حبيبي وكَال

حبني حيل… واتمهل

أسطر حروف تتشابج

مثل السنبل ابحقله

يتعانكَ فرح لو شاف

نور الشمس يضحكله

يسهر لو إجاه الليل 

ويه الكَمر يتسله

لو بسم حبيبي وكَال

حبني حيل… واتمهل

أسطر حروف تتلامع

تضوي او تشع مثل النور

أحبرها ابنقط من در

مخطوطه ابحجر بلور

والماز او ذهب خالص

تتوهج ابحزمة نور

لو بسم حبيبي وكَال

حبني حيل…واتمهل