فاضل كريم
جبت جرحي اعله جرحك جيت عناي
اصوغ من الجرح مرهم يداويك
كلت جنه اصيرن رغم الجروح
ما ادري تحب دوم اليجويك
تهوى انته الجمر جا غير الك روح؟
غير تكلي حته بناري اخليك؟
امشي اعله الجمر وتحنه بالنار
ملعون اليجي يمك يطفيك؟
اشفت من غيري كلي الغير شطاك؟
مشاك بدرب تالي نكت بيك
انبكت مني غفل واتسمه مبيوك؟
جذب انته الرحت وبهاي رجليك
عيوني افراش الك لو تغفه وتنام
ومن تبرد حبيبي بجفني اغطيك
اجر جدمي اعله دربك وامشي تعبان
كل هذا واكولن بلكي الاكيك
لاكيتك شفت غيري المشه وياك
واحس كل دمعه نزلت صرخت اشبيك؟
جازاك بغدر ما انصف وياك
ولومطيك عمره ما يجازيك
جبت جرحي اعله جرحك جيت عناي
واريد عيوني تسكت حته احاجيك
راويني شعمل بيك انته الفراك؟
لك لاله اعله بختك خل اراويك
الي جرح اليكل للثاني لتنام
بس تنام صدك هسه اصحيك
ماغزر ملح لازاد لاماي؟
ماغزر حناني وياك شطيك؟
خلص دوري بعد ما مثل وياك
خل يمثل وياك النكت بيك
على الساني حبيبي جانت تلوك
هسه تلوكله الخاين يسميك
ابدي الماي لوانته الصرت ماي
واكص جفي اذا ماراد ابديك
جفك من رماني بسهم الفراك
تيهني السهم كتله انه ادليك
خجل مني السهم من شاف الجروح
صرخ كلك جرح جا وين اذيك؟؟!
