فايق كاطع الحسن
رشفة من العذب عطشان ترويني
احس سهمچ نفذ باصلب شراييني
تره گلبي رجيچ ومثل باقي الناس
انتي أول شخص يعرف موازيني
احسب بالوكت مدري الوكت عداد
چن ساعات وكتي باگت إسنيني
وصدگ صرتي سوالف والزمن دوار
ييمه وصورتچ تفتر على عيني
محطه ليل تاهت والعمر رحال
انه اخلافچ يتيم ومن يسليني
ييمه اشلون بيه والهموم اهواي
علي اترادفن والفرگه تچويني
صحت يمه ييمه وصوتي ظل مبحوح
امن أگولن يمه يمه هم تسمعيني
احسچ فوگ راسي من يمرني الضيج
واحسچ والله دم يسري بشراييني
ييمه الدم مثل حالي عليچ ايصيح
اخر قطرة منه اتگول تانيني
انه بگلبي مكانچ ظل يبعد الروح
ويم اتراب گبرج فدوه غطيني
ييمة الموت من الله ترى مفروض
بس ردتچ ييمه انتي التشيعيني
غفلة الدار گالتلي يفايق گوم
لابو الحسنين يمه إهناك وديني
