علي الشباني
الشمس ودتني في ابيتكم.. ودتني في
رحت بعيوني الظهر داوي.. حزن وتراب
وبروحي يفيض المي.. فيضي ياروحي تعب وتراب
وتعنى المشه ابعمري سهر.. وندگي ويه الباب
يمكن بالعمر.. ينفتح مره الباب
واعلك لك شمع ع الباب .. واتعناك
ادگ روحي عله العتبه نذر ومخضر اتمناك
اصيرن في للمخضر.. اصيرن في وشب گامة خضار ومي
اسيلن غاد افيض كل سواجيك.. اسيلن غاد
الملم كل عطش روحي واشتله ابابكم سدره
جبيره وبالعطش توكف سواجي زغار
حزينة وبالربيع تخضر الها اعشوش
يلعمرك فرح مرشوش
يلحزنك خبز يبجي الصبح عن الناس
يلعشگك درب مسكون
ون من الزغر بالراس
وقرالك دفاتر ضيم.. ويظل بس حرف بالراس
ما ينگال .. يلعشگك هني وچتال
يلفني الدرب واتدوهن وگول شماله گلبي المايشوفك حن
ولك گلبي حمامه هناك.. من تمشي يطك جنحه ويطير اوياك
يلما مش بعد سجة .. گضيت وياك
بس هو العمر ما ينگضي ابلياك
لاهو المرض ويطيب.. ولاهو الشمس وتغيب
هز الماتشوفه العين.. وبروحي يفرفح ضي
يمر بي الگمر والمي
وجيب الشمس.. اوگفلك يلسمر في
