محمد خشين
متت وانه عدل وتبده ماي الروح
طاحت من ايدي ونكسرت الجره
من فكري عشت جا من اموت شلون
وهسه انه متت والمات من فكره
خلصت العمر وي هاجس الحرمان
وعليه هذا العمر كابوس معتبره
من يوم الصرت ومكمط انه بعوز
وفاطمني الوكت على الاه والحسره
ومشيت بدرب هم ابشط من السيف
واحر من الجمر وبوحدي بصحره
وشفت شجره وكلت يمها انتجي وارتاح
ومن خليت ظهري ادنت الشجره
وراهنت الوكت درهم رهن مشمور
والخونه العمر لو اربحه لو خسره
هو اختار طره وكتبه انه اختاريت
وتانيته شوكت هالدرهم يشمره
وعلى الدرهم اعاين وأيست فدنوب
وجهين اصبحت لمن وكع طره
مارابح ابد جبت العمر خسران
وشيفيد الربح للخسر كل عمره
يفتر بالعكس ضد الفقير الكون
وصعب دوم اليريده ومايصح مره
مقياس البشر للاسف صار المال
لو عنده البشر لو محد يقدره
الغني طك الفقير كبال كل الناس
وكلها الناس ركضت جنها متحضره
على المكرود ركضوا كلهم يصيحون
خدك ليش يضرب جفه ويسطره
شلون اصبر بعد وصبر تكلي شلون
اعمه بيا بخت والضملك الابره
تعبت من الركض وابقه اركض لياحين
سباق الدنيا بيها الناس متوزره
واذا واحد وكع ينسحك بالرجلين
وجدام التدوسه تكمله الجبره
وجفن خط النهاية اليوصل يلفوا
وجائزته دفن يتوسد بكبره
غير الي تضحيله يضح كون
وبدره بليلك الاظلم يضح كون
مشيت وعفت شماتي يضحكون
تبجيهم اذا رديت اليه
