رائد ابو فتيان
يامحلا ذيج ايامنه الماترد
من جان املنه شايلنه بشنط
واحساسك الانثوي واحساسي الخشن
بمدرسة حبنه يداومن مختلط
جان المعلم يطرد المايحل
ومن متجاوب اني اطيح بورط
خاطر يطردني واجيلك ركض
لو يسال عله اسمي اجاوب غلط
الزعل عند الكبار يترك حقد
وجنه احنه هم من اهالي الوعي
جف الصلح منعرفه يعني شنو
ترعل وترضى بس امد اصبعي
ومن وره عيونك كمت اشخبط شعر
وبس عالفرح قلت اكتب المسمعي
وجي انته يمي جنت اكتبه الفرح
وبس درت وجهك جربيت النعي
اطفال نمنه واخذ حصته الزمن ولما كعدنه
ماربيه الكبر وقلدت انته انسان حب بوفا
وجنت اني اقلد اليدق بس بحبر
اكتب حروفك فوقهن بنقط واتمنى
كدامي يصرن خضر
واكشخ واجيك العصر واضرب ركن
وبحجة ترش بابكم تنتظر
منكول عيب الناس جي حب صدك
مو مثل هسه دغش بس بستر
وتلاقفتنه الجامعات ومشت انته بكتر ذبوك واني بكتر
وذيج البرأه انمسحت من الوجه
المكياج سوه خدود وجهك صفر
وكروبك بنيه ومادري جم ولد
تركض وياهم ماعدت تنتظر
ولما تعرفني صرت تنحرج
تكلهم كرايب مو حبيب الصغر
