سامي عبد المنعم

الى الشهيد صافي العگيلي ( أبو فهد )
بعدها اتناطرك گمرة ..
وبعد موگد مضيفك ما خمد جمره
وبعد صوتك يرن ويه الفناجين
وتفگتك عامره وامتيله المهره
وصهيل اكحيلك ايطرز هوى اعگيل
وعبد صيهود بعده يجذب الحسرة
وبعد صليات (أبو محيسن) تضوي الليل
ودواوين السلف مستانسه ابفكره
وبعد (جلعة سكر) تهمل ادموع العين
مثل حزن اليتيم الخنگته العبرة
وايحن الرفاعي الـ (عوده ابن زيدان )
والغراف بعده ايعاتب الشطره
ينشد عن گبر(طارق علي السبهان )
و(سعد محسن) بعد كامرته تنتظره
وأمي اشگد صبرها وتنتظر لليوم
يرد الها (منير) وتخمد الجمره
وبعدها الناس تندب حيدر الكرار
وتودي النذور وتگصد الحضره
وبعد جرح العراق ايطول كل مصباح
ورموز الحقد تتربص لغدره
كل يوم اليمر نسگي ابدمانه الگاع
وحزبنه ابعز شبابه وما نفذ صبره
أمس بغداد سكرت من عطر (سعون )
وإ نصبغت سماها امن الحزن حمره
يا ( صافي ) وحگك وحگ جرح الناس
بعدنه اعله العهد باقين والفكره
گمره : هي أرملة الشهيد