عارف مأمؤن

بس شوف المعيدي اشترك من بنيان
آنه القدمت نور الحرف للكون
انته اشقدمت جاوبني بالبرهان
مجبور ارد اقارن حتى تفهم زين
وحط حد الغرورك وكشف البهتان
آنه انتج حضاره وشاهدي التاريخ
وانته انتاج فكرك مبني عالعدوان
آنه اول مسلّه الشالت القانون
بوكت فوضى حياتك تشبه الحيوان
صح معدان …
بس لجل الوطن لمعيدي من تنخاه
يركض للمنايه ويفتدي الاوطان
أمس بالحد شواهد عندي من هديت
بوكت انته بنوادي العاصمه سكران
مو قصدي ارد اذمّك لو أبيّن اعيوب
لكن من اقارن يطفح الميزان
انتصر دمي اعله سيفك من جنت طاغوت
والمعيدي السجنته انتصر عالسجان
ولساني الكَطعته بحقدك المسموم
خضّر بالحلك من دمه ميت السان
صح معدان …
بس نعرف نسامح والدليل اليوم
كَدرنه..وقابلينه السوء بالاحسان
المعيدي المثلنه بروحه يفدي الجار
مو مثلك تحزّم يذبح الجيران
ما فتّش الجناسي مثل ماسويت
اخوي انته سواء علي لو عثمان
انه ابن الوطن لمعيدي ابن الهور
اشرفها العروبه وتاج عالعربان
انه ابن الجنوب الجذري واصل اور
عنواني شمس ..چا انته يا عنوان ؟