سيف الحلفي

من تزور انسان شاعر
عايش ايامه الاخيره
هاي عند الله جبيره
ولتتحارش بالقصايد
عمي هاي اعراض وادم
ما اخذ غيبة قصيده …
كل شريف وعنده غيره
احترم شعر الي قبلك
واحترم شيب القصيده
يرزقك الله بصورة شعريه جديده
ودير بالك
تنتقص منهم حرام
الشاعر الشايب يشور
حطله سبحه ومحبس يبين امام
وكل قصيده الهة عمر,,مثل البنات
شكد قصايد حلوه ذبلها الزمن
والقصيده الشابه بكذلتها كون
تمسح دموع القوافي الشيبن
وهو مو كلمن كبر طعمه يروح
الماي من يشيب نضوكه لبن…
انت شاعر
مفرداتك كوم لبسهن حجاب
واحنه من نعرك نضل نصب عشك
ومانحب النار من وكت الصبا
حتى بالختيله ماصحنه احترك
عالورق نرسم خبز باحساس حار
بالرمش خيطنه حلمه الينفتك..
وصدك مانتعرك احنه
بس تشاهد بينه غيرة الاشقياء
وعدنه ركن اسلام سادس
اسمه ركن الاصدقاء..
وعله طاري الاصدقاء..
كله انطي لربعي ما اذكر خذيت
من صباي وروحي عشكت هالدرب
بحاله وحده لروحي جنت اخذ صحيح
بالطفوله بلعبة السبعه صلب
وجنه نتعارك كبل عركة جهال
وعيني تبجي اعله المثل من ينضرب
وجنت امد جفوفي بالعركه وافوت
بس امدهن للصلح مو للضرب
ومن يغيب الصاحب ادعيله يعود
دعوة ام العسكري بوكت الحرب…
وييين رجعتني القصيده
لذيج ايام الطفوله
من جنت اصغر.. واضعف بالوزن
ومن جنت اكتب ..وازحف بالوزن
من جنت اكتب ست اوزان ابيت
لمن جانو كل اخواني ابيت
جان العيد ثمنتيام
وجانت عله كدي المرجوحه…جنت زغير
وجنه طيور بلا جنحان..بعيديتنه نطير
وابقى اتمرجح
واصحابي يدفعوني بظهري..بس مو للبير
من تصعد فوك المرجوحه..
بعيني اتناوش صدر الغيمه..
جنت اتخيل روحي كلاده
وافرح ماجني بمرجوحه..
جن شابكلي رسن كحيله..
عد روحي فارس طرواده
واليدفعني جان يصيح..
هاي زواده ..لعبد الساده
ذكرتوني.بفاضل عبد الساده
راح اقراله..
ليل ووحشه
وبنادم ماطبك رمشه
ومزاليك الدنيا تخوف وتدور عالناس الحرشه
حزني اسود من شيلة امي…امي؟
(امي بهذا عمري وتسأل الناس
تكلهم مالكيتو وليد ضايع؟)
وارجع لسالفتي..احنه
وداعتك معدنه خاص
انت بس اكتب قصيده
وخلي اسم الزهره بيها
تعتبر ضد الرصاص