محمد خشين

خجلت ابسكتي شكد حياطين
ولكيت لساني بي متأثره حيطان
طاير واهسي لحد السماوات
بحياتك شفت واهس عنده جنحان؟
انه بوكت الكواغد ليش شبيّت؟
احترك عمري وصفن لسنين دخان
ولو خليني بلكي ارتاح بالموت
وتتلّكاني ذيج الدنيا بحضان
تتسرفن كبر للميت الكاع
وبتراب اليعزب والله دفان
الزمن ماعنده ذمه يبيعلي اوهام
وبعد ماعنده ذمه..وعنده ميزان
الشمس لمن تطكني اتوسد الكاع
عله شيل الضوه..مابيه تعبان
كمت شديت حيلي ونفسي مكطوع
لان بالريح مو بالماي غركان
تشلبيت اعله خلكي اليحسد الخيط
وجبل همّ العلّي وبصدري بركان
كصير ومايكفي لصفنتي الليل
تعب جفني منهد كاروكي سهران
انه ملجوم مو مارايد الناس
الحمام يطير مو كرها بالاغصان
شكثر من عيني طاحو وي الدموع
اضن بيهم سلف بس انه ربحان
عشت يم ناس واحدهم شسميه
عصر لو عصره مابي قطرة انسان
طلعت روحي لمن دكو الباب
جنت شايل كلب من غير بيبان
وانشد روحي يمته ارتاح؟؟وتكول
لمن تلكه بالفردوس شيطان