احمد ماضي القلعاوي

يا وطن .. يل ما كو مثلك ..

موج شاطيك ضفيرة .. الطفلة فرحانه بنتيجة مدرسة

يا وطن .. يل شيلت اذراعك قصيدة ..

أختزلت الإبداع كله وغردت بأحلى الجمل

ترابك بجف الجياع ايصير خبزه

وماي نهرينك رسايل للعشكَـ

مااصدكَـ تنكسف بيك الشمس

ويومك اتخلصه بحزن شوغات أمس

أنت بالحب يا وطن ريشة حمامة

ولا كَلب منه ينز

أنت اسمك شالته الوادم حرز

يا وطن .. مشتاكَـ ابوسك ..

بس اخافن تعثر اشفافي بلغم

عركَت ارسوم الخريطة .. بكثر ما شافت ظلم

ورغم ما كل سجت ادروبك كَزاز .. انا اشوفنها ورد

انت مصحف للبطولة ..

وآيتك للموت عبوة بكل عجد

يا لسان العلم الدنيا حجيها

ونقذ كل الآدمية من الجهل

أنت ما تحتاج أرفعلك علم ..

أنت اسمك من أرفعه تنحني كَباله دول

حتى تغريدت عصافيرك غريبة

تعزف ألحان وغزل

مرت سنين وترس عيني عتاب

وأنت شباجك بعيد

انا أريد أقره قصيدة بيه أول بيت عيد

ما أريد أقره قصيدة على المقابر للعبيد

يا وطن مشتاكَـ ابوسك .. راح ابوسك

حلوة لأجل البوسة أتفجر شهيد