حسين القاصد

صالح مضكور بالكتب هواي، وتقريبا ماكو سالفة مابيها (صالح ) وكل (العالم ) دايخة بصالح وبطلايبه .. هو وخالته كواغد يتگلب علينه وكل ساعة وضاكر زاير مشكور بسالفة .. ويبديها بـ (صبحكم الله بالخير) وينهيها(سااااااااكم الله بالخير ) واحيانا بالعكس ، وسالفة صالح مدوختني .. لأن جده سيف الدولة .. يعني هسة هو لو بامريكا چان اسمه (نووي ) الدولة !! وصالح موشوية بس اني اضوج منه ، ولاتغركم سالفة مال هو صاحبي !! تره الله وكيلكم صحبة فيس بوك .. لأن ابو المثل (صدگ هو من ابو المثل ؟؟) يگول : اذا تحچي كون شاهدك وياك ، وانا بسنة 2010 التقيت بالشاعر اليمني عبد المجيد التركي ، شفته بسوريا وچان مهرجان شعر وكلشي وكلاشي ، وعبد المجيد سألني وگال : اذا اوجه لك دعوة لليمن تجي ؟ جاوبته : لا . سألني ليش ؟ جاوبته : لأن بيها (صالح ) !! هسة تضكرت صالح لأن بعد كم يوم راح يصير ملتقى بغداد الشعري ووجهنا دعوة لصديقي عبد المجيد بس لايسمع بـ (صالح ) ومايجي !! تردون الصدك ؟ صالح راح يسودني لأن عايف الانفجارات والاعمال الارهابية و(العراك) السياسي (هذا ابن عم الحراك السياسي ) .. عايف هاي كلها صويلح ومچلب بسالفة كلش موش خوش .. والله شنو ؟؟ وين مايروح يستهزئ ويگول (حسين القاصد يسأل عن المثل منو ابوه ؟؟) چا هسة ابتليت ؟؟ لو لأن جدك چان يمدح بيه المتنبي تريدني امدحك ؟؟ هذا بس لا سمع البيت مال المتنبي (غريب كصالح في ثمود )وعباله عليه؟؟ ماعلينا .. اني راح اروحن لخالة صالح حجية (كواغد ) واخذ الحبايب وياي من عضوات البرلمان .. واخليهن يقنعن كواغد ويتعهدن بلملمة الازمة وياخذن على عاتقهن ( عود شنهي عاتقهن ؟) موضوع الملف الامني ويشكلن كتلة للتفاوض مع الفرقاء السياسيين ولأن زحمة يروحن وحدهن لازم ياخذن وياهن (ملا ) وبهيچي حالة .. صالح يكف من (العالم ) واگوم يومية اروح اشوف جماعتي واشوف كل (العالم ) لأن مابيها (صالح ) ابدا .. واصلاً محد يفكر بصالح المواطنين حايرين بس بزاير مشكور !! فجأة غطيت في اغفاءة عميقة وسمعت صوت انفجارات بكل مكان وركضت واني نايم بس الحلم مالي وياي الى ان عطشت من شدة (الشدة ) وشفت ماي مكتوب عليه (ماي صالح ) للشرب !! گلت وين أولي بعد الواحد يموت احسن !! اذا حتى الماي بيه صالح!! عساها بحظ زاير مشكور… لايابه كواغد!!

إنهاء الدردشة