حسين القاصد
هاي سالفة القرابة والعشاير وصلة (الرحم ) مضكورة هواي بالكتب .. بس اكو عوائل تختلف نسمع بيها ونشوفها بس شو مو مثلنا؟! مثلا: انتم تدرون ان العرب هي الامة الوحيدة اللي مستقبلها ماضٍ!! ودائما تصيح وتردد كان اجدادنا العظام!! وكنا أول من قال: كلمة (ياهوووو) وبعدما قام الاجانب بسرقتها واستعمالها بالانترنت!! وعلى هالرنة… بس لايغيرون النغمة وبعد مانعرف الرنة!! ماعلينا بالوادم.. بوية السالفة لها علاقة باللغة والعرب أهل حمية يعني باللغة يجب ان يقوم الفاعل بفعله على احسن وجه.. مثلا: في اعماله العبادية يصوم النهار ويقوم الليل ويصل الرحم ويقذف بالحق على الباطل!! ماكو مايصير فاعل حتى لو عنده واسطة بالبرلمان!! بس نوبات الفاعل يغلس!! ويدز (نائب) الفاعل!! ويبنى الفعل للمجهول وتغلق القضية!! چا انتم شفتو (نائب) بيه خير؟! واما المفعول به فشغلته واضحة وتحتاج شرح بس العرب دائما يشككون بالاشياء لذلك يضطرون للتوكيد مرة بالقسم مثل (ميثاق الشرف )!! ومرة بحروف التوكيد ومن حروف التوكيد اكو حروف تشبه الافعال بس مو بالضبط!! لذلك يسمونها الأحرف المشبهة بالفعل.. وهاي يسمونها (إن ) واخواتها.. ولأن العرب مالهم اي علاقة بالمستقبل لأنهم أهل ماضي عتيد وتليد ( تليد البارحة شفتها بالكتب لاتسألوني عن معناها) لذلك ماتركوا (كان ) وحدها وشافولها خوات وصارت مثل (إن) تتمشى العصريات هي واخواتها وأكبر جملة تگلبها على البطانة (اللي اغلى من الوجه!!) .. وحتى تكتمل السالفة ظلت عندي (منذ).. وين أوديها ؟؟ شنووو؟؟؟ لازم تتفق عليها الكتل؟؟ لو نصوت عليها بالبرلمان.. ؟؟ خلوها تولي بس يبقى الشعب يسب (ان ) من وراكم لأن لايوجد شيء مؤكد عدا ماكان!! وحصل فعلا!!! خرب (إن)!!!
