للشاعر الكبير حمزة الحلفي
الك نشكو الظلم يحسين يامظلوم
عليك ابخت جدك أن تعثرهم
وعذرا سيدي وحاشاك يامولاي..
من عندك هذوله وانته من عدهم
بضمايرنه الحسين .. الچانو يگولون
اخبرك سيدي باعوا.. ضمايرهم
***
فرحنا وگلنا فرجت بعد ذاك الطاح
مثل الطاح طلعوا چنه صاحبهم
ومثل حيتان حطوا ترسوا الخضراء
واجتنه وجوه مشكوك بمصادرهم
باگو بوگ .. مو ياهو اليجي ويبوگ
لحد ماغصت وزاعت مصارفهم
كلهم شلع باگوا دون استثناء
من خادم جمعهم لحد سيدهم
***
بعضهم بيه عداله وراح بالرجلين
كسرو خاطره الناس،وطلع منهم
وبعضهم كفروه .. گالوا عليه زنديق
لأن ما مد اديه وباگ بوگتهم
ناس بلا ضمير وعدهم المفتاح
وجرحك ياوطن ماكسر خاطرهم
***
وصلت للعظم ياسيدي ومولاي
وبعد يخسه الصبر لوراد ينصرهم
ندري احنه بدواهم.. ساحة التحرير
وبس هاي الوحيده الصدگ ترعبهم
ابد ماينغسل ذنب الحرامي بماي
ناس ابلايه ذمه اشلون .. تغسلهم
***
على ريش النعام اكروشهم ترتاح
وابطال الحشد صخره مخدتهم
وابطال العراق الشرطه ويه الجيش
وابناء العشائر واليساندهم
ضحوا بالنفس ياسيدي ومولاي
يحرسون العراق .. والله حارسهم
***
من عدهم شربنه الحنظل بماعون
ومن نفس الطعم لازم نشربهم
ثار سبايكر يوميه بينه يفور
ودم شبانه الراحوا .. برگبتهم
السياسين سنه وشيعه والاكراد
علينه اتحالفوا .. وبأمر حاكمهم
وين افلوسنه …… نص الشعب إيجار
وشحده اليمر من يم منازلهم
حراسات ونقط تفتيش .. للستار
واهل حي التنك.. الجوع ماكلهم
وجميع اولادهم بالدول متعينين
وولد الخايبه محد يشغلهم
رَجعوا اصواتكم ياشعب بالتحرير
انتخبتوهم غلط شگوا استماريهم
ماخايف وارجف منهم ومرعوب
وحقك ياحسين الوحدي اگابلهم
افضحهم واشرهم وانشر الاسماء
والشردوا نكضهم واليشردهم
كافي مو تعبنه وحتى هذا الموت
يمّوت بينه .. بس ومايموتهمِ
