الوكالة مضكورة هواي بالكتب .. منها قولي : نعم ، فتقول : نعم ، قبلت وأنت وكيلي ، وهاي السالفة ماتتم الا بحضور سيد (وجيه ) يحمل وجاهة .. وسالفة الوكالة طويلة والوكالة انواع .. گبل بزمن النظام الساقط حشاكم .. چانوا يعينون وكلاء بالامن (همزين هسة ماكو أمن بس وكلاء ) ماعلينا ، ويگولون هذا الوكيل چان شغلته مثل شغلة العلاس والمخبر السري مال هسة ، بس الوكيل مال گبل چان وجهه مكشوف والوادم تعرفه وتخاف منه ، وهسة حتى الشرطي ملثم بس الارهابي يمشي براحته ومن يسألونه بالسيطرة السيارة باسمك ؟؟ عندك سنوية ؟؟ يجاوب : عندي وكالة .. يمشي براحته .. والوكلاء انواع .. اليوم ما أريد اطوّل السالفة .. بس نوبات تشوف لافته مال محامي ويدوّر على وكالة .. والمصريين يشترطون لكل وكالة بواب !! لأنهم يعترضون دائما ويگولون (هي وكالة من غير بواب !!) وحتى تكتسب هاي الوكالة وجاهة لازم يحطولها بواب !! والوجهاء هواي والوجهاء هواي .. بس ذاك اليوم شفت لافتة مكتوب عليها (فلان بن فلان رئيس مجلس الادراة وكالة) .. الحقيقة دخت ردت واحد (وجيه ) حتى لو وجيه عباس وأساله عن هاي الطرگاعة !! وشنو اعراب كلمة (كالة) باللافتة ؟؟ لأن الواو حرف عطف يعني (كالة ) معطوفة على فلان !! اتصلت بوجيه عباس .. جاوبني علي وجيه وچان ضايج لأن (الوكيل) مال الحصة مسويله حظر بالفيس بوك !! يعني ماكو لاعطف ولانص حرف ولارحمة ولا حتى أي تحشيش واحتمال يغلقون صفحته بقطع كونكريتية لدواعٍ امنية ( زينة دواع مووو؟ ).
كتاب الحقيقة
