حسين العكيلي
على شفاي الندى مال اول العام
يمن رشفت شفافك عسل بشفاي
لهسه يهيض بيهن عطر طاريك
بس يلجمني اعرفنك علي جاي
ترافة ورد روحي بغيبتك ذاب
ذبل بعجاف هجرك وانحنه صباي
صوت دموع عيني تحس لحن بيه
وصاحب منه انه بجفاك عالناي
اليزرع ورده كون جفوفه ترفات
ويمد روحه نهر ما يشح بل ماي
زرعته بروحي ورده وعيني ناعور
ونـزلت الرموش لحضرته فياي
حصدت بجفي بس عاكَول ودموع
جازاني بغدر تعويض لرباي
محاضن والشماته جفوفهم سيف
هواهم لان سيف وحاضن اعداي
عليه يمرهوه الله سهام بجفاك
بكل شهكَه جرح يتحاضن وياي
جرحك بيه عله تشيب الراس
يزيد بلجمته شما حطو دواي
سنينك لحظه جانت عرضه للبيع
وتداينت اعله عمري وجيت شراي
الجبل هيبه وابد ما يتعثر بريح
ونزلت انه لتواضع تله جواي
يدهري انحب واظل الطم عللي
جفاني وزادن بغدره عللي
الجانن تحت من جدمي عللي
ومن كفخاتهن شفت المنيه
