حسين القاصد
كل العناترة مضكورة بالكتب .. وأول عنتر هو عنتر بن شداد وهذا سالفته سالفه ومو وكتها هسة .. بعدين العراقيين سالفتهم طويلة وي العنتريات وحتى المسلسلات اللي يستوردوها مثل (غوار الملا محمد.. الطوشي ) وجان اكو شخص وياي اسمه ابو عنتر وابوعنتر هذا مدكَدكَـ ومنزل شواربه (خميس وجمعة ) .. وبعدين من صعدت سالفة العربان وانتعشت الزراعة في العراق وزع النظام الساقط سيارات بيك آب للفلاحين وصار شعار المرور هو : الأسبقية لمن في (البدي ) .. البدي مال البيك آب مو مال (ام البدي .. اللي دائما يسوولها درب حتى تلعب جولة !!) ، ماعلينا بام البدي !! يكولون بوكتها وزعوا للفلاحين (تركتر حمراء ) اسمها عنتر 70 ( ترى 70 مو هواي !! ) و سالفة العنتريات تطورت ودخلت موديلات جديدة مثل (عنتر نشونال ) وعنتر ميلان .. وعنتر شايل سيفه ( لا العفو هاي فيلم ) .. اخر شي دخل لنا هو العنترنيت .. والوادم تونست وارتاحت شكو عدهم بعد شو عنتر(نيت) للصبح !! بس العنتر نيت مضكور بالكتب ويكَولون فاسق جدا .. لأن يجيب اخبار !! وآخر خبر نقله لنا العنترنيت هو خبر هم بيه عنتر !! ومفاده ان العنتر بول يريدون يكظون طارق الهاشمي ببروكسيل ..يكولون شايفينا واكَف بصف حايط وراكضين وراه وصايحين .. جا انت ماتقرأ ؟؟ مو مكتوب على الحايط البول للحمير !! فهو استغرب ليش البول بس للحمير مع ان (الجمل) اكثر اصالة وبول البعير مضروب بيه المثل .. ودائما يكولون : من هالمال حمل جمال !! طارق احتار بالسالفة .. وسأل روحه كال معقولة كالوا : من هالمال حمل (زمال ) واني حافظها غلط ؟؟.. سرح بالافكار وصفن (كالعادة ) .. وماحس الا واحد يسئله انت عفت الدنيا كلها وبلت هنا ؟؟ ماتخاف من العنتربول ؟؟ مو كاتبيلك لافتة ؟؟ طارق صفن اكثر .. وكال ليش ما اكول اني طارق الهاشمي من جماعة البعير !! عندها (نهق ) ناهق من اهله .. فتركه العنتربول . ملاحظة : عنتر بالعين ولكن الاجانب لايملكون (عينا ثاقبة .. بس كابسة !!) لذلك يكتبونها بالهمزة !! اللي هي بالانكليزيA .
