نصير العراقي
انه دمعاتي مرة بطعم فركاك
تعال وجيتك بعمري اشتريهه
مثل شهوة الاعمى يشتهي الشوف
ضحكتك بالضبط هيجي اشتهيهه
وديلي خيالك اكعد وياه
واذا تكدر رسالة اتلهه بيهه
عفتني بنص شماته اشلون شمات
بس يعجبك تباوع عليهه
مثل اول ثواني الشايف الموت
هيجي الصار بيه بلحظة جفاك
وكف كلشي وعيوني احتارت وياي
احس بيهن متيهه تريد ملكاك
سويت القصيدة اليوم مرسال
الك خاف الك نيه يطول فركاك
اذكرك خاف تنسه الموعد الجان
مثل هيجي وكت جنت اطلع وياك
برضاتك مارحت لاوالله مجبور
رحت كدام عيني ودمعك يسيل
وبقت صفناتي طيف بنصهه كابوس
تميل الدنيا كلها وجسمي ميميل
وماكلك سهر ودموع وجروح
يطلعها بشبابه الشايف الحيل
بكثر ماجنت اشوفك هسه العيون
الساعه مكابلتهه برحمة الميل
ماميز كمت مابين الاوقات
الظهر بتلاثه مدري تلاثه بالليل
تعال عيوني رسمك بيهه وشلون
تدور اعليك طلعت خاف تنداس
مثل وردة وتموت بجدم فلاح
بعدك صار طعني من اقرب الناس
ودموعي ادموع شاعر تعرف اشلون
اذا طاحت بصبخه تخضر احساس
