حسين القاصد

من المضكورات بالكتب هي كلمة (حي) وهاي الكلمة من بداية الحياة. والله “عز وجل جعل” من الماء كل شيء حي .. والحي مذكر و مؤنثه (حية) ومثله مصيب ومؤنثه (مصيبة ) او كارثة !! وهذه الكوارث دائما يكون سببها نائب بالبرلمان ومؤنثه (نائبة ) .. مصيبة + كارثة + نائب ( طارق الهاشمي ) + نائبة (وحدة !!) = ضكرى حي !!

قفا نبك من ذكرى (الأويلاد ) ياهلي

وسخط (القوى ) في كل حيٍّ ومنزلِ

والحي (ابقى من الميت ) كما يقال في المثل المصري .. والعراقيون يروق لهم تسمية مناطق سكناهم بالأحياء !! وهم اموات تحت حكمهم يصلبون !! .. وسالفة الحي طويلة.. وتشبه سالفة الاعمى والبصير باللغة .. لأن مامعقولة حي يفقد (120) شابا بحادث ارهابي اسلاموي برلماني !! ويبقى (حي) !! هذا اللي صار بحي العامل .. ولا خلف الله عليكم ولاعلى جوامعكم .. حي العامل بناها زلمة استلم الحكم ولحد موته لاراح للحج ولا تزوج مو مثل (وحدة) تشمر حجارات على الشيطان وتتفق هي وبنات (طارق) الهاشمي على ابادة (حي ) العامل اللي وزعها على عمال السكك المرحوم عبد الكريم قاسم .. وسالفة حي العامل.. ياناس يااسلام !! ياحكومة !! تشبه الفيلم الهندي .. واذا تريدون تأكدوا بنفسكم !! لأن الانفجار في المقهى الذي يقع في باب الفوج (المحصن جدا ) وعلى بعد امتار من الانفجار توجد لوحة مكتوب فيها (المنطقة خاضعة للتصوير !!) جا اذا خاضعة للتصوير ليش تحذرون الارهابي ؟؟ واذا فعلا خاضعة للتصوير شلون صار الحادث ؟؟ … زين الحي وعرفنا معناها يعني ميت !! بعدكم مصرين على ان الجامع يجمع الوادم ؟؟ زين يجمعهم تحت شعار الحزب ؟؟ اذا اسم الجامع 14 رمضان ؟؟ والاسم له علاقة بالبعث وباستشهاد الزعيم (كرومي ) .. يعني من المنطقي ان يقوم الجامع (اللي مايجمع بس يفرق ويقسم ويطرح!!) بقتل الناس اللي وفرلهم عبد الكريم كلمة (حي) ورماهم جامع (بنات طارق ) بوابل من الموت !! والله لو ما الحزن جان رحت بحثت عن معنى كلمة (وابل ) خاف احد يسألني وزحمة !! (خاصتن) خطباء الجوامع المفرقعة !!