مهند العزاوي
لاتكشف جروحي الملح عندة عيون
خاف يعاين ويلجمهن بنضرة
ولا تكسر غصن كدام اي عصفور
لان من عينة توكع هيبة الشجرة
عفتني بحالة تشبه حاله الجناز
من يشيل اخو ويشمرة بلحفرة
صرختي البلحلم وصلت لسابع طيف
مو جيراني فزو فزت الكمرة
ما عايف علكّ عفت ايدي عل شباج
وعفت روحي مداس بعتبة الحضرة
اليوزع نذر معناها لاكّي مراد
وانا المالكة مرادة ولا حضة بنذرة
لو نيتي اعوفك جا بقيت وياي
لان طبع الحبيب يحب اليغدرة
عفت بية جرح ماصار بالمسجون
من تمر زيارة ومحد يذكرة
التخّلف مرّيتة وهوة بالسرداب
لا بد ما يزورة وليدة يم كبرة
واليضيع عكالة بديرة مال اجناب
لابد ما يحن عكالى للغترة
شد راسي العطش حد ما نسيت الماي
وبقيت اشرب سرابك ماخذت عبرة
تعال الوحشة تكتل من اصب الزاد
ما واجلني واحد طول هل فترة
ومن كد ما ضجت دزيت عل شيطان
متعمد اكلت الزاد باليسرة
لا عاكر واتوب ولاني ام التوم
صرت بحالة تشبه حال المعسرة
يفز بية الجرح وي فزة الفلاح
واشوغن شوغة الصبير عل كطرة
شلت بعدك صبر ماشالة بيت الطين
اكابر علة جروحي مكابر الفقرة
وعدة جرت النفس شعراية ما جريت
واوميلك تعال وضهرك تجرة
يسالوني اعلة صدري شكم جهنم بي
يحتركون عالم من اهد حسرة
مثل حسرة يتيم وخلص بي رمضان
نام وماسمع جابولهم فطرة
