الشاعر / سعد محمد الحسن
حاجة بربع … حاجة بربع
حاجـة بربــع
مفتح گبل طبت العطش فيض ونبع
حاجة بربع حاجة بربع
مفتح على عناد الوضع
فوگ الرصيف المنشلع
گد مايروح اعليه ويرد الدمع
حاجة بربع حاجة بربع
كلشي انـه ابيعنه بربع
العين بربع .. بس شرط اخذهه
بلا دمع ،ِ
ردلي الدمع .. تدريني اني بحاجة دمع
كل ساعة يمعود انفجع ومحد فزعلي من الربع
بس الدمع …
العين اخذهه وسوي فضل
عالاقل مـا اشوف الورد من ينكطع
وعالاقل ما اشوف الغزالة تموت بانياب الضبع
وعالاقل ما اشوف الصگر بانياب غربان المـزابل ينصرع
وما اشوف ثوب المستحه من گصه الحديثات غصبن ينزع
حاجة بربع…….. حاجة بربع
الرية بربع
بس شرط اخذهه ويالظلع
مو بس ظلـــع كلهن شلع
ملـيـــــت مــــن نـغـــــز الــظلـــــع
ليل اليمر اعليك ما اغمض جفن
يكتل صليل الجوع ابد ما ينجرع
كلشي بربع
حتى السمع هــــم بربع
شفايتلي لو بعت السمع
عالاقل ما بعد استمع
صوت الثكاله التنفجع
وصوت الگلوب التنشلــــع
كلشي بربع كلشي بربع
كصتي بربع
لكن شرط …….. النگطة لازم تنـرجـع
كلشي بربع كلش بربع گَّلب واخذ كسر بجمع
بس لا تگللب رگبتي
لا ما ابيعن رگبتي من تنطيني الدنيا شلــع
لا ما ابيعن رگبتي چااا راسي بيمن يرتفع ؟؟
كلشي بربع
حتى الگلب هم بربع
بس انه بي ما مقتنع ما بي نفع
ينبض ودم ما يندفع!
يدگ لچن ما ينسمع!
ما بي نفع ما اريد اغشن بي بشر ما بي نفع
بس انه اگلك بي طبع …. يصير للصـاحب درع
كلشي بربع
بس الجرح
مجاني اصيحن بالجرح
ومحد اجه ايگلب الجرح
حد ما نبح صوتي اصيح من الصبح
ومحد اجه يگلب الجرح
زواده احط ويا حلم بس منذبـح
وجماله احط ويا جفن بس منجرح
محد اجه يگلب الجرح
محد اجه يگلب الجرح الناس متسوگه ذبح
انطي ضمانة ويه الجرح
انطي گرنتي ويه الجرح
تـــــازه وشــــــــرح
وما اجني جرح الذيب اعرفنه نذل
جروحي مالت عوز واحدهن سمح
………
انه جروحـي عرايس من ازفهن
وغده حمــرة حلكهن من نزفهن
انه من ازمــخ عليهن من ازفهن
انط زهكان ويظحكن عليـــه
انط حيران ويظحكن عليـــه
