سالفة (الوگافة) مضكورة هواي بالكتب .. وذوله الوگافة موجودون بكثرة بمجالس العزاء .. يعني نكدر نسميهم أخوة شمهودة !! لأن يلطمون وي الكبار وياكلون وي الزغار .. هاي السوالف بمجالس العزاء اللي تعيش عصر ازدهارها في العراق بسبب الارهاب (المفتح باللبن !!) .. وأول حالة شفنه بيها (الوگافة ) هي عند امرئ القيس .. لأن هذا الزلمه يكولون .. مايبجي الا وياه اثنين وگافة اصليين !! وبالعصر العباسي ازدهر الشعر والناس ملت من الوگفة .. فصار المتنبي يقرا وهو گاعد !! مو انوب يبجي وگفة!! حتى ابو نواس (الله يرحمه ويرحم والديكم ) جان ماراضي على الوگافة .. ويگول اللي يريد يبجي خل يتفضل يستريح شعنده واگف ؟؟
قل لمن يبكي على رسم درس
واقفا ماضر لو كان جلس
وراح وكت وإجه وكت ورجعت سالفة الوگافة وإجه الجواهري وگال :
قف بالمعرة وامسح خدها التربا ….
ومن يومها الوادم ردت للوگفة.. والزلم مواقف .. واذا تمدح فلان تكول هذا ابو الوگفات !! (بس لاتفتهموني صح لطفا!! ) .. الى ان وصلنا لهذا الزمن وصار كل عضو برلمان عنده خمسة لو ستة وگافة يدافعون عنه يسمونهم (محللين سياسيين) وبعدين سالفة الوگافة انسحبت على الثقافة وعلى المهرجانات .. واحنه كلنا ندري بأن الوگافة تنتهي سالفتهم بس تخلص الفاتحة ويكفّون (الجادر ) يعني .. الوگافة وي الجادر مثل المواعين وادوات الطبخ .. بس تخلص الفاتحة يرجعوهن !! بس من تطب لمهرجان لو لفاتحة .. اول ماتشوف الوگاف تظنه شيخ عشيرة اذا بالفاتحة واذا بالمهرجان تظنه لو وزير لو رئيس اتحاد .. وبعد دقايق ينتهي دوره بس يكولون : (الله بالخير ) .. يكولون الفواتح صارت بالجوامع هالايام حسب العائدية لأن القتل يطلع من الجامع !! لذلك بالجامع مايحتاجون وگافة .. بس بالمهرجانات يگولون تفاقمت الازمة ( ماادري تفاقمت ترهم هنا لولا ) ماعلينا .. يگولون تفاقمت وصار بكل مهرجان شعري وگافة (وحملة دار ) من كلا الجنسين ..ما ادري ليش تضكرت اغنية (واگف على المسعودي ) صدك على كولة ابو نواس : ماضر لو كان جلس ؟؟ .. اروح انام أحسن لأن للصبح جنت واكف !! بمستشفى اليرموك .
