حسين القاصد
من المضكورات المهمة بالكتب هي سالفة الشروق !! والشروق انواع .. منها شروق الشمس وشروق الامل .. وشروق المستقبل واهلنا گبل يگعدون بالمشراگة !!ولأن من الجنوب يسمونهم شروگية !!والشروگية شبعوا ضيم .. جانوا يزرعون وغيرهم ياكل .. ودائما يكملون الحصاد كبل الناس (لاتفتهوني صح) والزرع مالهم يروح للخفگات النايمات للظهر .. توصل بيادر الحنطة لبيوتهم والوادم اهل الخير الاصليين جوعانين .. هاي السالفة تضكرتها كبل ايام من رحت للديوانية !!والديوانية منطقة زراعية و مضكورة بالكتب ، لأن هي كلمة جاية من الديوان .. والديوان اشكال بس شگد اضوج من يطلع برنامج ديوان الريف بايام النظام الساقط ابن الساقط .. ماعلينا .. المهم الديوانية عند اهلنا هي غرفة الاستقبال .. يعني تشبه المضيف ..لذلك كلما اروح للديوانية اكول اني طبيت للجنوب فلازم ادخل للمضيف بالديوانية .. صدك الديوانية بعدها منطقة زراعية ؟؟ ماعلينا بالوادم . بس لو ترجع منطقة زراعية چا صارت عاصمة العراق الزراعية مثل البصرة عاصمة العراق الاقتصادية !! وجا زالت كل العراقيل امام (شروگـ ستان).
