حسين القاصد

الفرقة مضكورة بالكتب هواي, و(الفرقة) صعبة عند العشاق, واكو فرقة ناجية, واكو فرقة ناجي عطا الله, والفرق اشكال يعني من توصل لبغداد وانت جاي من المحافظات اكو لافته تكول (قيادة قوات الفرقة ………ترحب بكم) لان بغداد ثكنه عسكرية (لحد يسألني شنو ثكنه) ومادام اكو فرقة يعني لازم اعضاء بيها, والمشكلة حتى المرأة من تكون بالفرقة تتحول من امراة الى عضو (بس لا تفتهموني صح) وهكذا دواليك (جمع دولكة)

ما علينا, نرجع لسالفتنا, يكولون المرأة حتى تدافع عن حقوق المرأة لازم تصير (عضو)بالبرلمان ولازم يلغون تقاعدها, رطينه مو؟؟ هيّه الكتب تدوخ كلّش..

بس على مرّ العصور (وحتى بين العصر والمغرب!!) جانت اكو فرقة وعضو فرقة, وايام البعث المنحل (اخلاقيا) صار الاعضاء كل ستة بدرهم, بس قبل يومين اخبرني الصديق الشاعر الكبير كاظم الحجاج عن احسن عضو فرقة, الفرقة كانت الفرقة السمفونية وعزفت بافتتاح بغداد عاصمة الثقافة وكل اعضاء هاي الفرقة يعتبرون احسن اعضاء هاي الفرق..