محمد الحجامي
اشتكيت ال الله من عندك عليك
كتله نايم واني كل عيني السهر
انت جاري ومادنت نفسي ودنيت
كلبي اشطر مني واعليكم عبر
كلبي شاطر صدري مو شاطر واجاك
انت صدلي وشوف من عندي اشكسر
اذني والحايط مثل عشرتنه هيج
وحتى مره الحايط من اذني اعتذر
كلهه اسف ضام هلهوله علج
خفت اجرحج انه ضميت الخبر
وحتى ينقل صوتك الاذني بوضوح
من مكان البي احطنهه انفطر
واسمع امك تندعي ابوكت الصلاة
يمه عين الله عليك من الخطر
وكمت اغار من الله جي عينه عليك
واني ادري ب الله ميغازل بشر
انت لاعب بل عقل فريته ليش
جان ينطيني الامر هسه الامر
جان يوكع شعر من اصفن عليك
هسه اصفن مو شعر يوكع شعر
بالي ابني وضاع بس ابني الجبير
فشله من الناس ماكول انتحر
جلدي صبخ والملح لبراسي شيب
مرني بلوه ابير ماريدك نهر
بعدك احسب كل دقيقه يمرني صيف
مرني ساعة جله مارايد شهر
انت بس غيم واحس روحي ارتويت
عمي علت وياك مارايد مطر
اني شامخ كالجبل بس روحي غار
المرسل البل غار شو بس القهر
وايه نزلت مختصر كل الكتاب
مايردلك كالت ابكل مختصر
كتلي انت ومستعد بس ما اطير
وكتلي ليش كتلك اجناحي انكسر
جنحي صاحي وماطرت اصبح صغير
هواي طاروا بس حجم ظلهم زغر
اني فارشلك سفر من دمعي عود
وانت تفهم بالغلط تفرش سفر
انت زغرت الكمر لمن مشيت
واني بعدك زغرت بس الكمر
عيني تركض وانت احس جدك سراب
زحمته ابدي ادموع بديت النظر
كلت اجاني من الظهر ماانطي بيك
وانت جانت جيتك من الظهر
