حسين القاصد
البيت مضكور بالكتب هواي واهم البيوت هو البيت الحرام .. والبيوت كلها زينة .. وحتى القصيدة عبارة عن منطقة سكنية قد تصل الى اكثر من مئة بيت كما فعل مولانا الجواهري (رحمه الله ) في قصيدته المقصورة !! وحتى الاغاني ماتخلو من (البيت ) اذا تتضكرون وياي اغنية ناظم الغزالي ( طالعة من بيت ابوها ورايحة لبيت الجيران ) بس يكولون بوكتها واحد فايت ومامسلّم على ناظم الغزالي ويكولون جان كلش حلو بس يمكن زعلان !! (على ذمة الوكالات ) .. ماعلينا بالوادم .. هسة عليمن حاركَـ دمي هو والغزالي يتعاركون يتصالحون .. ؟ بس اني مقهور على هاي اللي راحت لبيت الجيران .. والاغنية خلصت وصار حظر التجول وهي ماكو !! ومحد جابلنه خبر عنها .. اني شخصيا ( طبعا شخصيا!! بس ليش الواحد يلح على ضكر كلمة شخصيا !!) المهم نرجع لسالفتنا اني شخصيا بقيت للصبح انتظر يعيدون الاغنية بلكي ترجع البنية لأهلها .. كَبل لايسمع ابوها ويسويلنه طلابة !! .
عاجل .. معلومات امنية عن شهود عيان شايفين ابوها (واكَف على المسعودي!!).
