عدنان الركابي
من ماي الورد رب الحسن سواك
ومن جابتك امك بيك ماحست
ولروعة جمالك عندي بس تفسير
امك بالنساوه بيوسف اتنست
=================
حرست بستان حسنك خايف يبوكوك
وشفت حاله غريبه اتجسدت عندك
خدك من حلاته الشفه تاكل بيه
سيجهه الشفايف مو كضت خدك
===================
حلو للانهايه وداخلك مسكون
وقسم تنشل يمينه الفكر يجيسك
البشر يعرف حقيقه يكرهه حيل ابليس
بس انت عليك امخيل بليسك
===================
عكس الناس تنحل واضعفت فد نوب
ودكتورك لطم من دنك يشخصك
كلك من حلاتك منكسم نصين
هسه تموت نصك ياكل بنصك
======================
امس خلف ولد جارك ودرت اعليه
تبارك والعجب من دنكت راسك
صاح شهالجمال البعده بالكاروك
فل كماط زغره وفرفح وباسك
==================
امس بابك سمع منك همس معزول
اظن ياباب خلي ايطول فراكه
افتهمهه انك تريده بسرعه كام الباب
فلش عتبته وطلك الطلاكه
=====================
يالمهدر جمالك مثل جاي وهيل
وزن لامحترك لافاهي لا شايط
امس بيتك وكع والصوج منك جان
اعله شيلة صورتك حايط ردم حايط
