محمد ابو سراج
هز جذع الشمع وافرش شليل غروب
عثك الخيط ينكت على الهندس نــــور
… ولاتنطي الظلام بخجل عطوة ليــــــل
خل طلقة ضوه بصدر الليالي تثــــــور
الاخمس للجتف مسندهه مو للكــــاع
حنجرة التفك ـ لو هلهلن ـ شاجـــــور
اليكشخ بالصدى مديون للحيطــــــــان
وعلى جدران صمتك صوتي بصمة صور
تمعن بالجناسي واقره اسمك زيـــــن
لــــــــــــــو جدك فطر لو بالاصل زاغور
ولتعادي الشمس وتحشم الغربيـــــل
بمحكمة النهار البومه شاهــــــــــد زور
باطل بالشمس من يحلف الخفــــاش
المو جفه غصـــــــــن ليصافح العصفور
يغرف صم ضوه طبع الكمر لـو دار
يجفي عله الارض شايل خلك نـــــاعور
طعم الكربه ينزل دهن بالـــزردوم
واثردله ابنفط يتنومس التنــــــــــــــور
ولو سولف خبز حسجه بمضيف الجوع
تنصتله البطون وكل حلك مسعــــــــــور
صح تنزع رسنهه المالكت خيـــــــــــال
ميعثر الدنان الرحَّــــَــــــــــــــه من اتدور
لتكلي المراجل بالدرع والطـــــــــــاس
زواغير السهر يندلهن الناطــــــــــــــــور
علمني الحسين الحرب زفة مـــــــوت
اكشخ بالجفن واتعطر بكافـــــــــــــــــــور
وبزود ابو فاضل من اهد تشـــــــوف
خنكة مغربيه وتهب ريح كبـــــــــــــــور
بينك والمنيه الجسر جف عبــــــاس
النـــــــاي عله الكصب يبتعد رمشة هور
حشاهه الجربه ابد ماشبخت عله الماي
ولاردت سهم عطشــــــــــان ريجه يفور
وكل الخيم لبسن صايـــــــــة ابراهيم
واتلكن النـــــــــــــــــار بكل كلب مجمور
طعم جدمه خفيف المامشه لحسيــن
حامض مــــــن يمر بعيون الاعمى النور
الضلوعه كصب لايلطم عله حسين
الشمّاتــــــــــه نمـــــــــــل ليكاوم الكافور
الموحمل الفشك وتحشم الترباس
لـــــــــو غصت تذب فشلتهه بالشاجور
بأول عين ثارت غركن الصوبيـــــن
المــــــــــايعرف يفوج يشيل من عاشور
غشيم العلكمي بيده استمارة مــــاي
يدور بالعطش تعيين عالمستـــــــــــــور
يطش روحه مذله بمسحك الـــــزوار
عرض عمره مقابل كلمة الـ مأجـــــــور
الهوه واكف قصاص لرايــة العباس
شما دارت وجهه وياهه وجه يـــــدور
وبسوك العطش رايد محل ايجــــــار
باعراب الفخر حتلو اسم مجــــــــــرور
وخطيه النار ركضت تنتحر بالمـــــاي
من شافت حقوق الخيم بالدستـــــــــــور
ويتمنه الفرات يزور كبر حسيـــــن
واصابع ماي يعلك عالمقام بخــــــــــور
وصدر نقل الرمح من آله بالميدان
يتحول حطب ايفاد للتنــــــــــــــــــــــور
