يگلبي بيش اخيطنك ولحماك
ولا واحد شگف عنك ولاحماك
يجيك الضيم من دمك ولحمك
من اقاطعهم تلوم الناس بيه
(عبد الواحد الهلالي)
يوصفون العوارف شجر من شاف
على اطرافه يموج السيل منشاف
اكلنا التمر والغصن منشاف
ميت لا شاف شمس ولا وطيه
(حسين الغالي)
مُر وكتي بعد ما چان حالاي
وسيل النزل بالدار حالاي
تعال انت يحمدي وشوف حالاي
وشوف النايبه الحلت عليه
(ابو معيشي)
انه الما يوم عاذل .. ملكيته
وابد ما امل زماني .. مل لكيته
يريدوني اهدّه .. من لكيته
اعمه وجلبّت شيفك ايديه
(صباح الهلالي)
منهو الكدرك يا زين ..من ساك
يبو ثغر البعود الارك .. منساك
انه بحتف المناية وكلت .. منساك
بنهر جسام وذكرك عصف بيه
(عطا السعيدي)
الزمن هيهات يلوي ساعدي انه
ونساعد دوم كلمن ساعدانه
يل تسال على اصلي ساعدي انه
اهل نخوه وكَرم واهل الحميه
(حسين الساعدي)
زماني بفركتك حزين .. حزنه
وعلى كل الحزن والنوح .. حزنه
تعال على الدليل وشوف ..حزنه
مغيم ما صفه ومخبوط ميه
(رحيم المالكي)
وحك هموم البصدري .. والاكراب
الماي بغيبتك صدك .. ولك راب
الي رب اليصبرني .. وألك رب
اليفجعك بالعليهم خنت بيّه
(احمد الذهبي)
