حسين القاصد
المرور مضكورة بالكتب حتى يكَولون صاير ازدحام بالكتب من كثر مامضكورة كلمة المرور بيها ، وكَبل جانت العرب تكول : فلان مر مرور الكرام ، يعني رحم الله والديه من زار وخفف ، وهسة مو كلشي بكيف المرور لأن الكرام يفوتون عالعسكري وعالخاص وتبقى السابلة (عود شني السابلة !!) تنتظر بالازدحام وهو الدوام مايطول اكثر من ازدحامين وينتهي !! بس اكو سالفة موش خوش (موش عاملة عمل ليس ترفع الاول وتنصب عالثاني) المهم السالفة هي : اكو مظلة بنص بغداد صايرة عالرصيف !! يعني للناس الواقفة مو (السابلة !!) والمظلة حلوة وبالنايلون !! وكاتبين عليها (هدية محافظة بغداد) .. اني استغربت جدا !! لأن المظلة بنص بغداد والكلام المكتوب هو هدية محافظة بغداد !! بهاي الاثناء ردت واحد من (الكرام ) يمر حتى اسئله احنه هسه وين ؟ احتمال احنه خارج بغداد ومحافظة بغداد اهدت مظلة للوادم اللي بتلك المحافظة المجاورة !! ، بهاي الاثناء شفت (كيا ) امعوزه نفر واحد وكَلت خل أشوفها وين تروح حتى افتهم اني وين هسه .. وكف ابو الكيا بصف المظلة وصاح (واحد داخل !!) سألته عمي وين بالضبط !! السايق افتهمني كلش صح ورادت تصير طلابة بس اني شردت وختلت ورا المظلة وظليت اسمع السايق يصيح (واحد داخل !!) واني اكَول وي نفسي .. اذا هذا مايعرف الداخل من الخارج ! حاله حال السيطرات .. طبعا المحافظة تهدي لنفسها مظلة !!
