أثير التميمي
ا عمري شهل التواضع تمشي عَ الكاع
كفر مثلك حلو يمر بدربنه
علينه أدز خيالك كلش هواي
ونحس أنطيتنه أكبر من حجمنه
جف رجلك وجه بس كُذله ما بيه
نحط جا وين يم وجهك وجهنه
إذا نجمع سلفنه بأحلى ما بيه
تهد بشامتك تغلب سلفنه
ركضنه عله الفياي بيوم ملكاك
و شربنه الغيم من حركة كلبنه
مواسمنه أربعه و كلهن صفن بيك
شكثر جا بيك مطور علمنه
مشيتك جنهه الأزرك بارده هواي
و مثل ما يرتجف خصرك رجفنه
و لكينه أنفاس صدرك شايله الصيف
لذلك لمن أسولف عركنه
سمة عيونك ربيع
و شوفتك ماي
أكيد يخضر الشيب بشعرنه
و لأن جفك خريف بكضته نموت
مثل ورك الشجر يمك وكعنه
أظن بس أنت خالقك هيج
و الباقين لا هيج أنخلقنه
وسط جفك محابس لو شرايين
جف و كله يلمع ما عرفنه
إذا عيونك شواطي و جفنك أنغام
سفينة و نوح خايب رايدنك
تنام علة السطح بالليل ممنوع
أبتلينه بمنطقتكم من كعدنه
إذا بالسبعه تصعد صاحو أمساك
ولك رمضان و ستونه فطرنه
نصلي..نصلي وداعتك بس مدري شنكول
إذا خلصنه نتذكر وكفنه
علينه بطول شعرك طول البال
يقلدك باللبس ضيك خلكنه
ندك ببابكم بس مدري شنريد
المهم تكول منهو أنكلك أحنة
و إذا ردينة صوتك ما سمعناه
نخلي أهاتنة أشكك سمعنة
عليك بشوك مزدحمة الفراشات
صدى خدوك كسر سمعة وردنه
مدام أستعملتنه برقة البيك
لعد ضحكات من تمشي أشمرنه
هلك يا أيه كالوا يوم خلفوك
و أحنه شمالنه مبهذل نسلنه
شنو بيوسف تنست و أطلعت هيج
أدري أحنه ببلال أتنست أمنه
جنك رحمة الله و لابسه هدوم
عمر تنطينه بس ماخذ فكرنه
تزوجنه و كبرنه ولاحنه الشيب
و عله أيام الصغر أنغازل رجعنه
ألهي بكد جماله أنطينه أخلاق
نخاف أنذب طراكيع أعله أهلنه
