كون ايموت كلمن نرغب ايموت
وكون ايظل عدل بس النريده
وكون ايرد غني ومحمد اردود
ورحيم وبارق وروحه الشهيدة
وكون انرد جهال التاتي توات
ويجينه الطنطل وصوت الرعيده
ونداوم صبحي وي درس العصافير
ونقره بشامتج ياست وحيدة
ونركض من نحل حفاي للبيت
ونشاور بعض.ها.شفتو غيده
شفتو اش.. أشرت لبن ابو الدكان ..؟
حمامة سيد ورادت تصيده
ونسألها يعيده الشوط ياشوط
وشنحمله الهوى عيده ونزيده
ايييييييييه اشرجع السبعين للبال
بخت ينراد للذكرى السعيدة
ياريحة مطر بخدود التراب
ردتني الزمن محد يعيده
ردتني طفل بيد امه بالسوگ
دشداشة اشترتله بيوم عيده
ردتني طفل وعيونه ليفوگ
ويمتمت نسى الـكلمة ابنشيده
**********
كون الموت يرضه انواجه المات
مثل البالسجن يوصل بريده
اشكثر أشتاق لجم مندفن غاد
لكن شوفة الميت بعيدة
انه مفارگ بشر ماتشبه الناس
انهجم بيتج يروحي اشكد عنيدة
صلافة البيج ياروحي مثل ذاك
على اصبعه ويسد الباب بيده
عليهم مابجت بس الحمامات
ولا بس المجانين الشريده
عليهم لااله الا الشعرجان
بعد الله ولاعبدوا عبيده
وجه الكمر اصفر كاطع الزاد
وبجت عين الشمس كالت اريده
انهدم ركن الغزل ياشاطي فيروز
الصبح منهو البعد يوصفلي جيده
عود اشكد نتاني ومثلك ايصير
يمحمد بالوجوه الجديدة
ومثلك يامحمد ياهو بالناس
مشه وبس الفراشات برصيده
ومثلك يامحمد ياهو بالناس
كتب زينب على جفه عقيدة
دفنو ويه جثتك سبع نجمات
لان صوت الشعر دفنوا عميدة
*********
رسمنه اعله السواتر ذكرى ميتين
وشتمنه الشوش والنهضة المبيدة
وكتبنه اعلى الجماجم اغنية خوف
يغني الفاو واليعزف حديده
مثل العيد شالع كلبه رمضان
داست عمرك الحرب المجيدة
كفرنه بكل حروب الخاكي والناس
تكتب عالهروبات العديدة
وانت تخندقت شعرا ولايوم
طخت هامة الوعي المديده
محمد جان دمعة بخد عفيفات
ويموع الماي لو خلاها ايده
***********
لكه الخلوة الطويلة بقصر التراب
وكعد يكتب على الموته الوحيدة
وجن اذني تسمعه يقره بالليل
للماتو قوافيه الفريدة
ترس وجه الجفن شعر الحبيبات
وكتب نايل ترف فوك الجريدة
من كلك غني ماكاله الله
لو كاظم خبط ماصاح عيده
اذني اتأكدت لو شاكه ايصير
بس شاعر فحل لاهاي اكيده
حلاة الكال شاعر لو كتب كون
يشلع صرة الكاع بقصيدة.
5-2011
