حسين القاصد
كل الكتب المضكورة بيها كلمة (منتسب) ماتفيد وي السيطرات !! كَبل يومين جنت جاي من العمارة ، وجانت السيارة اوباما !! وهو البشر الوحيد بعد ليلى علوي اللي يحمل اسم سيارة !! اوباما مامضكور بالكتب بس بالامثال الشائعة يكولون (الرجل الاسود ينفع بالبيت الابيض ) بس المنتسب سالفته سالفة !! يكول احنه وحدتنا بالموصل والسالفة تخوّف ويومية (علاسة ) والضباط كلهم علاسين !! لذلك بطلت من الجيش ورجعت للسيارة على خط بغداد عمارة .. اني جنت صاعد بالصدر!! وهو يسولف يكَول جانت ليلى علوي (اني راسا افتهمته صح وانسحنت روحي !!) وبعدين تعبت وصارت قديمة وجبت هاي الاوباما !!( همزين ماحس بيّه من انسحنت روحي) المهم جيب الليف .. ودي الليف !! ( لحد الان ماعرفت ليش يجيبون الليف ويودونه !!) ماعلينا بالوادم ، بقينا نسولف لحد ماوصلنا للسيطرة والشرطي كَال هوياتكم وسايقنا جاوبه وكَال: اني منتسب !! فالشرطي اعتذر من السيد السايق وسحب هوياتنا كلنا وكال انزلوا ماعدا السايق !! هاي السالفة بمدخل الكوت من جهة العمارة ، فسألت الشرطي .. جا هو بس السايق منتسب ؟؟ احنه ولد الخدامة مثلا !! الشرطي اجاب بثقة عالية بالنفس (فغط ) المنتسب للجيش والشرطة !! اني هم استحيت من روحي وكَلت اذا هو منتسب وراكب اوباما طبعا يفتحوله الطريق !! الله يرحم ايام كَبل جانوا ضاكرين المنتسب بس وياها شوية رزالة حتى ينضبط !! لايامنتسب يا ابن المنتسب على هالسالفة !!
كن ابن من شئت واكتسب أدباً
يُغْنِيكَ مَحْمُودُهُ عَنِ النَّسَبِ
فليس يغني الحسيب نسبته
بلا لسانٍ له ولا أدب
